16 jastaǵy shved belsendisi Greta Týnberg Soltústik keńestiń qorshaǵan orta jáne ekologiiany qorǵaý salasy boiynsha usynatyn syilyǵan alýdan bas tartty.
Týnberg Instagram áleýmettik jelisinde: “Mundai syilyqqa ie bolý - úlken abyroi, biraq damyǵan elder Parij kelisimin oryndamaidy eken, demek atalǵan syilyqqa eshkim laiyq emes”, - dedi.
Qazir Kaliforniiada júrgen boijetken, tabiǵatty qorǵaityn belsendilerge syilyq emes, úkimet tarapynan nazar aýdarý men qoldaý qajet dep sanaidy.
Daniia, Islandiia, Norvegiia, Shvetsiia jáne Finliandiia elderinen quralǵan “Soltústik Keńes” jyl saiyn jazýshylarǵa, mýzykanttarǵa, rejisserlerge jáne ekologtarǵa birqatar marapattar beredi. Biylǵy ekologtarǵa beriletin marapatqa Gretany eki memleket – Norvegiia jáne Shvetsiia birdei usynǵan.
Qazan aiynda Greta BBC telearnasynyń taldaýymen, 2019 jylǵy eń yqpaldy áiel tizimine engenin jazǵan edik. Al maýsym aiynda Amnesty International ony “Ar-ojdan elshisi” atty bedeldi syilyqpen marapattaǵan.
Greta Týnberg – ekologiialyq problemalar men klimattyń ózgerýine qarsy kúreskerlerdiń eń tanymaly. 2018 jyly boijetken Stokgolm parlamenti ǵimaratynyń aldynda narazylyq bildirý úshin ár jumadaǵy sabaǵyna qatyspaǵan. Bul álemdegi myńdaǵan jastardy shabyttandyrǵan jáne Fridays for Future (“Bolashaq úshin sarp etilgen juma”) halyqaralyq uiymynyń qurylýyna sebepshi boldy.
2019 jyly tamyzda boijetken Niý-Iorktegi BUU-nyń klimat sammitine qatysý úshin Atlant muhityn jelkendi kememen júzip ótken. Sammitte qyzý sóilegen sózinde ol adamzat ekologiialyq apat pen jappai qyryp-joiýdyń aldynda turǵanyn jáne saiasatkerler tek aqsha men ekonomikalyq ósim týraly ertegige ǵana alańdaitynyn aitqan.
