«Asyl Miras» qaiyrymdylyq qorynyń, Qazaqstan tennis federatsiiasy men tanymal qazaqstandyq jáne sheteldik kompaniialardyń toptamalary shyǵarylǵan qaiyrymdylyq aýktsiony barysynda belgili sportshylardyń bylǵary qolǵaptary 10 mln teńgege jýyq qarjy ákeldi. Serik Sápievtiń qolǵaby 1 mln 950 teńgege, al Gennadii Golovkinniń qolǵaby 8 mln teńgege satyldy, dep habarlaidy BNews.kz.
Sonymen qatar, buǵan deiin habarlaǵanymyzdai, júzýden Olimpiada chempiony Dmitrii Balandinniń fýtbolkasy 1 mln 450 myń teńgege baǵalanǵan bolatyn.
Aita keteiik, biylǵy qaiyrymdylyq velojarysy Shýche-Býrabai kýrort aimaǵynda ótti. Dástúr boiynsha aktsiiaǵa Olimpiada chempiony, Astana pro Team» komandasynyń bas menedjeri Aleksandr Vinokýrov basshylyq etti. Jinalǵan qarjy Aqmola oblysynda bronh-ókpe aýrýlarymen aýyratyn balalarǵa kómek retinde beriledi. 2016 jyly joba aiasynda 20 million teńge jinaý josparlanyp otyr. Bul qarjy balalardyń ómirin qutqaryp qalýǵa, ólim-jitimdi azaitýǵa sep bolady.
Sondai-aq jinalǵan qarjynyń bir bóligi Qyzylorda oblysy ortalyǵynan shalǵaida ornalasqan Aral aýdandyq ortalyq aýrýhanasyndaǵy shala týǵan balalardy kólikpen qamtamasyz etýge jumsalady.
