Beisenbi kúni Sochide álemniń jetekshi uiymdarynyń qatysýymen tuńǵysh halyqaralyq boks forýmy ashylady, dep jazady TASS.
Forým Resei boks federatsiiasynyń bastamasymen halyqaralyq olimpiadalyq jáne kásipqoi boks federatsiialarymen birlesip uiymdastyrylǵan. Onda kásipqoi bokstaǵy basty uiymdardyń direktorlary keńesiniń otyrysy ótedi.
Sochidegi forýmda Halyqaralyq boks qaýymdastyǵy (AIBA), Búkilálemdik boks qaýymdastyǵy (WBA), Búkilálemdik boks keńesi (WBC), Halyqaralyq boks federatsiiasy (IBF) jáne Dúniejúzilik boks uiymy (WBO) syndy jetekshi boks uiymdarynyń ókilderi jinalady.
Sharaǵa 130-dan astam memleket ókilderi qatysady. Resmi baǵdarlama qatysýshylar arasynda - WBC basshysy Maýrisio Sýleiman, WBA prezidenti Hilberto Mendosa, IBF jetekshisi Deril Piplz, úsh dúrkin Olimpiada chempiony jáne alty dúrkin álem chempiony, kýbalyq Feliks Savon jáne álem chempiony, úzdik kásipqoi boksshylardyń biri, qazaqstandyq Gennadii Golovkin bar.
Forým 1-3 aqpan kúnderi Sochidyń Pullman qonaq úiinde ótedi. Jiyn baǵdarlamasynda tóreshiler seminarlary, WBA jáne WBC direktorlary keńesiniń otyrysy jáne Sýleiman, Mendosa, Piplz jáne Golovkinniń qatysýymen «Álemdegi olimpiadalyq jáne kásipqoi bokstyń damýy» taqyrybynda pikirtalas alańy uiymdastyrylady.
Sonymen birge, senbi kúni Sochidegi «Bolshoi» sport saraiynda kásipqoi boks keshi ótedi, onda reseilik Murat Gassiev pen kýbalyq Iýnier Dortikos arasynda Búkilálemdik boks sýperseriiasynyń jartylai finaldyq aiqasy ótedi.
Sondai-aq, ringke burynǵy álem chempiony Fedor Chýdinov, WBA internatsionaldyq belbeýiniń jáne WBC kúmis belbeýiniń iegeri Mihail Aloian, Vage Sarýhanian, Maksim Vlasov jáne Roman Andreev shyǵady. Forým qatysýshylary men qonaqtary resmi jattyǵý men salmaq ólsheý rásimderine bara alady.
Forýmnyń jabylýy 4 aqpanǵa josparlanǵan.
