Memleket basshysy Nursultan Nazarbaev WBC, WBA (Super), IBO tujyrymdary boiynsha kásipqoilar arasyndaǵy bokstan álem chempiony Gennadii Golovkinmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Elbasy kezdesý barysynda bokstan álem chempiony Gennadii Golovkinge iltipat bildirip, qazaqstandyqtar onyń kásibi sporttaǵy jarqyn jetistikterin maqtan tutatynyn aitty.
«Otandastarymyz seniń jekpe-jekterińdi jiti baqylap otyrady. Sen Qazaqstandy laiyqty túrde tanytyp, óz otanyńdy eshqashan umytpai, júrgen jerde aityp júresiń. Biz seni maqtan tutamyz. Qyrkúiek aiynda seni óte mańyzdy jekpe-jek kútip tur. Barsha qazaqstandyqtardyń atynan saǵan jeńis tileimin», - dedi Qazaqstan Prezidenti.
Nursultan Nazarbaev Gennadii Golovkinniń Qazaqstan sportyn tanytýdaǵy jáne elimizdiń halyqaralyq imidjin arttyrýdaǵy zor rólin atap ótti.
«Sen óz salmaǵyńda eshkimge des bermediń, saǵan jeńilis tappaǵan eń úzdik nokaýter boksshy degen ataq berildi. Bul - zor jetistik ári bizdiń sportymyz ben búkil Qazaqstandy nasihattaýdyń jarqyn mysaly. Biz seniń erik-jigerińdi joǵary baǵalaimyz. Eger Qazaqstanda jekpe-jek ótkizýge múmkindik bolsa, biz oǵan jaǵdai jasap, qol ushyn beremiz», - dedi Memleket basshysy.
G.Golovkin jeke qoldaý kórsetkeni úshin jáne Qazaqstannyń sportyn, sonyń ishinde boks mektebin damytýǵa zor kóńil bólgeni úshin Nursultan Nazarbaevqa alǵys bildirdi.
«Men óz tarapymnan elimizdi halyqaralyq arenada odan ári tanytý úshin bar kúsh-jigerimdi jumsaimyn. Eger bári oidaǵydai bolyp jatsa, Qazaqstanda jekpe-jek ótkizý josparymyzda bar. Halqymyz osyndai aitýly oqiǵany tamashalaýǵa ábden laiyq dep esepteimin. Mańyzy zor osyndai jekpe-jekti barsha jurt kórgisi keledi degen oidamyn», - dedi G.Golovkin.
Sonymen qatar boksshy Qazaqstan Prezidentine WBC, WBA (Super), IBO jáne IBF tujyrymdary boiynsha kásipqoilar arasynda bokstan alǵan chempiondyq beldikterin syiǵa tartty.
Sońynda Nursultan Nazarbaev G.Golovkindi «Qazaqstan Respýblikasynyń Tuńǵysh Prezidenti - Elbasy Nursultan Nazarbaev» ordenimen marapattady.
