Almatyda belgili jazýshy, ádebiettanýshy, qazaq ádebietiniń kórnekti ókili Gerold Belgerge eskertkish qoiyldy, dep habarlaidy "Ult aqparat".
Eskertkishti saltanatty túrde ashý sharasyna Qazaqstannyń Memlekettik hatshysy Qyrymbek Kósherbaev, Mádeniet jáne sport ministri Aqtoty Raiymqulova, Almaty ákimi Baqytjan Saǵyntaev, elimizge tanymal aqyn-jazýshylar men ziialy qaýym ókilderi qatysty.
Qyrymbek Kósherbaev Qazaqstan Prezidentiniń quttyqtaý hatyn oqyp berdi.
«Halqymyz «Geraǵa» dep qurmet tutqan Gerold Karlovich sanaly ǵumyrynda ultymyzdyń ádebieti men mádenietin órkendetýge, qazaq tiliniń qaryshtap damýyna airyqsha úles qosty. Bala shaqtan dala demokratiiasyn boiyna sińirip ósken qarymdy qalamger ult rýhaniiatyndaǵy ótkir de ózekti máselelerdi de árdaiym búkpesiz aityp, qoǵamda talqylap, olardy sheshý joldaryn usynyp otyrdy. Eń bastysy, jazýshy Gerold Belger óziniń ómiri men óneri arqyly birligi jarasqan birtutas Qazaqstan halqyn qalyptastyrý isine qaltqysyz qyzmet etti», - dep jazylǵan Prezident Qasym-Jomart Toqaev joldaǵan hatta.
Eskertkish Jambyl men Sh. Ýálihanov kósheleri qiylysynyń soltústik bóligindegi saiabaqqa qoiyldy. Jazýshy osy mańdaǵy úide turǵan jáne únemi osy saiabaqta júrgendi unatqan.
Belger Gerold Reseidiń Saratov oblysynda 1934 jyly 28 qazanda dúniege kelgen.
1941 jyly Stalinniń jarlyǵymen KSSR-daǵy barlyq nemistermen birge Qazaqstanǵa, qazaq aýylyna (SQO-nyń Ysqaq Ybyraev aýyly) jer aýdaryldy. Bul jerde jas Gerold qazaq tilin úirenedi. Qazirgi Soltústik Qazaqstan oblysy Shalaqyn aýylynda qazaq orta mektebinde oqydy. Mektepti altyn medalǵa aiaqtaǵan. Abai atyndaǵy Qazaq pedagogika institýtyn jáne aspirantýrasyn támamdady.
Shyǵarmalaryn nemis, orys, qazaq tilderinde jazǵan. 1958-1960 jyldary - Jambyl oblysy Baiqadam keńsharynyń orta mektep muǵalimi. 1963-1964 jyldary - «Juldyz» jýrnalynyń ádebi qyzmetkeri.
1964 jyldan shyǵarmashylyq jumysta bolǵan. 1992 jyldary nemis tilinde shyǵatyn «Feniks» almanahy bas redaktorynyń orynbasary qyzmetterin atqarǵan.
«Aýyl shetindegi úi», «Daladaǵy shaǵalalar», «Alty asý», «Tas ótkel», «Baýyrlastyqtyń jandy beinesi», «Sozvýchie», «Ýaqytpen betpe-bet», «Motivy treh strýn», «Gete i Abai», «Rodstvo», «Zemnye izbranniki» zertteý eńbekteriniń, jekelegen áńgime, maqalalary engen 25-ke jýyq jinaqtardyń avtory. B.Mailin, H.Esenjanov, Á.Nurpeiisov, Á.Kekilbaev, D.Dosjanov, taǵy basqa qazaq jazýshylarynyń birqatar shyǵarmalaryn qazaqshadan orys tiline, A.Raimgen, E.Konchak, N.Vakker, taǵy basqa nemis aqyn, jazýshylarynyń jekelegen týyndylaryn nemis tilinen orysshaǵa aýdardy.
Qazaqstan Jazýshylar odaǵynyń B.Mailin atyndaǵy syilyqtyń, Prezidenttiń beibitshilik pen rýhani tatýlyq syilyǵynyń, sondai-aq Qazaqstan PEN-klýb syilyǵynyń iegeri. «Dostyq» ordenimen marapattalǵan.
Jazýshy 2015 jyldyń aqpan aiyda 81 jasqa qaraǵan shyǵynda ómirden ozdy.
