Jazǵy demalysta shetelge baryp eńbek etip, tabys tabýdy josparlaǵan 150-den astam qazaqstandyq stýdent jumysqa ornalastyrý qyzmetin usynǵan kompaniiaǵa aldanyp qalǵanyn aitady, dep habarlaidy ult.kz.
KTK arnasynyń málimetinshe, olar árqaisysy 600 myńnan 1 million teńgege deiin qarajat tólegenimen, ýáde etilgen jumysqa da bara almaǵan, aqshalaryn da qaitara almai júrgenin málimdedi.
Stýdentterdiń aitýynsha, olar jeti ai buryn kompaniiamen kelisimshart jasap, shetelde maýsymdyq jumysqa ornalasý úshin qajetti tólemdi tolyq nemese bólip tólegen. Kópshiligi bul qarajatty ata-anasynyń atyna nesie rásimdeý arqyly jinaǵan. Kelisim boiynsha shaqyrtý eki ai buryn kelýi tiis edi. Alaida belgilengen merzim ótkenine qaramastan, eshqandai shaqyrtý da, naqty jaýap ta bolmaǵan.
«Kompaniianyń Instagram paraqshasynda 50 myńǵa jýyq oqyrmany bolǵandyqtan, senim arttyq. Bes adam bolyp birge tirkeldik. Shart boiynsha 31 mamyrǵa deiin shaqyrtý kelýi kerek edi. Eger kelmese, aqshany tolyq qaitaramyz degen. Alǵashynda Germaniiamen tikelei jumys isteitinin aitty. Keiin bas tartý kelgen soń, Qyrǵyzstandaǵy kompaniia arqyly jumys isteitinin málimdedi», – deidi stýdent Sultan Muhamedjan.
Jábirlenýshilerdiń basym bóligi Almaty, Astana jáne Shymkent qalalarynan. Olardyń sózinshe, daý shyqqannan beri kompaniia keńsesiniń mekenjaiy birneshe ret ózgergen.
Taǵy bir stýdent Nurai Rahmanbettiń aitýynsha, bastapqyda Germaniiadaǵy DHL logistikalyq kompaniiasyna jumysqa ornalastyrý usynylǵan. Saǵatyna 14–16 eýro kóleminde jalaqy tólenetini, jumys úsh aiǵa josparlanǵany jáne aptasyna bes kún eńbek etý qarastyrylǵany aitylǵan. Alaida keiin kompaniia ókilderi bailanysqa shyǵýdy toqtatyp, telefon qońyraýlaryna jaýap bermegen.
«Bárimiz stýdent bolǵandyqtan, bul aqshany ata-anamyzdyń kómegimen tóledik. Endi eń bolmasa qarajatymyzdy qaitaryp alsaq deimiz», – deidi ol.
Al kompaniia direktory Miras Orazǵaliev aqshany qaitarýdan bas tartpaitynyn málimdedi. Onyń aitýynsha, másele sheteldik seriktestiń kelisimshart talaptaryn oryndamaýynan týyndaǵan.
«Biz qarajatty qaitarý mindettemesinen bas tartpaimyz. Biraq qazirgi tańda qarjylyq qiyndyqtar bar. Árbir klient úshin qyzmet aqysyn Qyrǵyzstandaǵy seriktesimizge tolyq aýdardyq. Alaida olar óz mindettemesin oryndamai, qarajatty qaitarmai otyr. Qazir bul máseleni sheshý baǵytynda jumys júrgizilip jatyr», – dedi kompaniia basshysy.
Kompaniia ókiliniń sózinshe, barlyq máseleni sheshýge keminde úsh ai qajet. Alaida buǵan senbegen stýdentter quqyq qorǵaý organdaryna aryz jazyp, istiń zań aiasynda qaralýyn talap etip otyr.
