Niý-Iorktegi «Medison Skver Garden» arenasynda kanadalyq Stiv Rollsty jeńgen Gennadii Golovkin qyrkúiekte ringke shyǵatynyn málimdedi, dep habarlaidy "Ult aqparat".
Kásibi bokstaǵy 39-shy kezdesýin jeńispen aiaqtaǵan Golovkin boks keshin qorytyndylap, suhbat berdi. Ol qyrkúiek aiynda «Kanelomen» kezdesýge daiyn ekenin jetkizdi.
«Men ózimdi jaqsy sezinip turmyn. Aldymen, meni qoldaýǵa kelgen jankúierlerime alǵys aitqym keledi. Men bastapqyda Stiv Rollsty baqylaýǵa aldym, qashyqtyqty saqtap bir-eki raýnda aiqasýǵa múmkindik berdim. Ol nashar kóringen joq. Biraq, onyń soqqylaryn sezbedim. Men ringke qaita oraldym. Ózimdi tineidjer retinde sezinemin. Endi kimmen ringke shyqqym keletinin jaqsy bilesizder. Qyrkúiekte Saýl Alvaresti kezdesýge shaqyramyn. Úlken shoý kórgilerińiz kelse, «Kaneloǵa» osyny jetkizińizder. Men ótken eki bokstan soń úlken qorytyndy jasadym. Qoldaýlaryńyzǵa rahmet», - dedi Golovkin.
Eske salsaq, orta salmaqtaǵy WBA Super, WBC, IBF jáne IBO chempiony Gennadii Golovkin kásibi bokstaǵy kezekti jeńisine qol jetkizdi.
Sonymen qatar, buǵan deiin jeńilip kórmegen jerlesimiz Áli Ahmedov tájiribeli amerikalyq Markýs MakDenielden basym túsken bolatyn.
