Qazaqstanda gazben júretin kólikterge arnaiy belgi japsyrý mindettelýi múmkin, dep habarlaidy QazAqparat.
Bul týraly QR Ishki ister ministrligi Tótenshe jaǵdailar komitetiniń tóraǵasy Vladimir Bekker aitty.
«Ázirge eki belginiń eskizi jasaldy. Onyń bireýi avtokóliktiń aldyńǵy terezesine jabystyrylady. Ol parkingte kirgen jaǵdaida kórinip turýy kerek. Olardyń jabyq parkingke kirgenin kúzetshiler nemese beinebaqylaý arqyly bilýge bolady. Kedendik odaqtyń tenikalyq reglamentterine sáikes, jol politsiiasy benzinnen gazǵa aýysqan kóliktiń tehnikalyq pasportyna arnaiy belgi soǵýy tiis», - dedi komitet tóraǵasy Ortalyq kommýnikatsiialar qyzmetinde ótken baspasóz máslihatynda.
Ekinshi eskiz - gazben júretin kólikterdiń jabyq avtoturaqqa kirýine tyiym salatyn belgi bolmaq. Tyiym salý belgisi jabyq avtoturaqtyń kireberisine qoiylady.
V. Bekkerdiń aitýynsha, ázirge bul belgiler qabyldanǵan joq. Shamamen, 2020 jyldyń ortasynda bekitilýi múmkin.
Aita keteiik, 2019 jyldyń jeltoqsanynda QR órt qaýipsizdigi erejelerine ózgertýler men tolyqtyrýlar engizgen Úkimet qaýlysy qabyldandy, onda gazben júretin kólikterdiń jabyq parkingterge kirýine tyiym salyndy.
«QR Ákimshilik quqyqbuzýshylyq týraly» kodeksiniń 410-baby (Órt qaýipsizdigi talaptaryn buzý nemese oryndamaý) boiynsha azamattyq qorǵanys organdary ereje buzǵandarǵa 5 AEK nemese 12 myń teńgeden astam aiyppul sala alady.
