Qazaq ulttyq agrarlyq zertteý ýniversitetiniń janyndaǵy halyqaralyq vaktsinologiia ortalyǵynyń direktory Qaisar Tabynov «koronavirýstyń almatylyq shtamy paida boldy» degen aqparatty joqqa shyǵardy, dep habarlaidy QazAqparat.
«Bul aqparatty jýrnalister durys túsinbei qalǵan bolýy kerek. Biz aminqyshqyldaryn almastyratyn mýtatsiia týraly aittyq. Tilshi ony «Almaty shtammy» dep qabyldady. Biz bul aqparatty joqqa shyǵaramyz. Biz «britandyq» jáne «ońtústik afrikalyq» eki mýtatsiiany dál anyqtadyq, basqa mýtatsiia týraly sóz bolǵan joq. Biz qazir virýstardy bólip jatyrmyz jáne olardy zertteý úshin, vaktsinalardyń tiimdiligin baǵalaý úshin, sondai-aq ázirlenip jatqan dárilerge baǵa berý úshin zertteýdi jalǵastyramyz. Bizdiń basty mindetimiz - osy», - dep túsindirdi ǵalym.
Buǵan deiin buqaralyq aqparat quraldarynyń birinde Qazaqstanda koronavirýstyń almatylyq shtamy paida bolýy múmkin degen aqparat tarady.
