Búgin UEFA Ulttar ligasynyń ekinshi týrynda Qazaqstan óz alańynda Belarýs quramasyn qabyldady, dep habarlaidy "Ult aqparat".
Atalǵan kezdesýde qos qurama shamalas oiyn kórsetti. Birinshi kezeńde eki qurama bir-biriniń qaqpasynan sańylaý taba alǵan joq. Birinshi kezeń 0:0 esebimen teń aiaqtaldy.
Ekinshi kezeńde belarýstik fýtbolshylar alǵa lap qoidy. Nátijesinde olardyń qatarynan Maksim Bordachev esep ashyp ketti. Budan ári qazaqstandyqtar tarazy basyn teńestirýge umtyldy. Qazaqstandyq shabýylshy Abat Aiymbetov 62-minýtta gol soqty. Budan keiin de alań ieleriniń gol soǵatyn birneshe múmkindigi bolǵan edi. Degenmen 86-minýtta Vitalii Lisakovich Belarýs quramasyn taǵy alǵa shyǵardy. Osylaisha Qazaqstan fýtbolshylary qarsylasynan 1:2 esebimen jeńilip qaldy.
Budan buryn eki qurama 2010 jyly Eýropa chempionatyna irikteý satysynda kezdesti. Eki kezdesýde de qazaqstandyqtar olarǵa 1:5, 0:4 esebimen jeńilip qaldy.
Belarýs fýtbol federatsiiasy 1989 jyly qurylǵan. 1992 jyly FIFA músheligine qabyldansa, 1993 jyldan bastap UEFA quramynda baq synap keledi. Sodan bergi ýaqytta atalǵan qurama joǵary jetistigimen kózge túse qoiǵan joq. Eýropa qurlyǵyndaǵy ortanqol qurama qatarynda sanalady.
Qazaqstan quramasy 4 qyrkúiekte syrt alańda Litvany 2:0 esebimen jeńip qaitty. Osylaisha dop dodasyn sátti bastady. Al Belarýs óz alańynda Albaniiaǵa 0:2 esebimen ese jiberdi. Týrnir kestesinde qazaqstandyq fýtbolshylar Albaniia quramasy ekeýi alǵashqy eki oryndy ózara bólisip tur.
