Túrkiianyń Antaliia qalasynda ótip jatqan oqý-jattyǵý jiynynda Qazaqstan quramasynyń bapkerler shtaby jańa júieni iske qosty, dep habarlaidy Olympic.kz saity.
Qazaqstan fýtbol federatsiiasynyń baspasóz qyzmeti málimetinshe, qazaqstandyq klýbtarda óner kórsetetin fýtbolshylardyń dál qazirgi mezettegi fizikalyq jaǵdailary tekserilip, olardyń kórsetkishteri arnaiy bazaǵa engizildi. Aldaǵy ýaqytta qurama komandaǵa alynatyn oiynshylardyń nátijeleri osy qordan alynyp, olardyń ár ýaqytta qandai progress jasaǵany belgili bolmaq. Sonymen qatar 6 ai buryn alynǵan nátijesinen tómen kórsetkish tirkegen fýtbolshy kerisinshe fizikalyq turǵydan nasharlap ketkenin de anyq ańǵarýǵa bolady deidi bas bapker Talǵat Baisýfinov. Ol qaraǵandylyq «Shahter» komandasynyń oiynshylaryn tekseristen ótkizip, óz pikirin bildirdi.
«Biz belgili bapker Pavel Cherepanovpen birlese otyryp búkil fýtbolshynyń dál qazirgi fizikalyq jaǵdaiyn ólshep, serverge tirkep qoiýdy jón sanap otyrmyz. Mundai júie qazaq fýtbolynda buryn bolǵan. Biraq, bizdiń qazir istep jatqan júiemiz sál keńeitilgen, tolyqtyrylǵan nusqa bolady. Mysaly, qazir «Shahter» fýtbol klýbynyń oiynshylaryn túgelimen tekserip aldyq. Olardyń ishinde jas aiaqdopshylar da bar. Bálkim olar premer-liga oiyndarynda ózderin kórsetip, talanttaryn tanytatyn bolsa, osynda jinap alǵan sandarǵa bailanysty biz qorytyndy shyǵaramyz. Kelesi bir oqý-jattyǵý jiynyna shaqyrǵan kezde osyndai testti taǵy bir márte qaitalap alamyz», - deidi Qazaqstan quramasynyń bas bapkeri.
