Qazaqstan fýtbol federatsiiasy men Qazaqstannyń kásipqoi fýtbol ligasynyń jetekshileri ortaq jiyn ótkizdi, dep habarlaidy Olympic.kz.
Fýtbol úiinde ótken kezdesýde Qazaqstan fýtbol federatsiiasynyń bas hatshysy Azamat Aitqojin, Qazaqstan kásipqoi fýtbol ligasynyń jetekshici Oljas Abraev, sonymen qatar departament direktorlary qatysty.
«Álem qaýymdastyǵy qiyn kezeńdi bastan keshirip jatyr. COVID-19 indeti kóptegen birlestikter men uiymdardyń tolyqqandy qyzmetine kedergi keltirýde. Onyń arasynda ártúrli sporttyń ulttyq federatsiialary bar. Barlyǵynda derlik jarystar toqtatylǵan. Pandemiia bastalǵannan Qazaqstan fýtbol federatsiiasynyń jetekshileri FIFA, ÝEFA jáne QKFL jetekshilerimen jii keńesedi. Sonymen qatar, bizdiń halyqaralyq áriptestermen birneshe beinekonferentsiialar uiymdastyryldy. Osy kelissózderdiń nátijeleri Qazaqstan fýtbol federatsiiasy men Qazaqstan kásipqoi fýtbol ligasynyń resmi saittarynda jáne áleýmettik jelilerinde jariialandy. Osy ýaqytqa deiin atqarylǵan jumystarǵa taǵy bir márte kóńil aýdaratyn sát týdy. Qazaqstandyq jankúierler men jarysqa qatysýshylardy bizdiń qurama men klýbtyq komandalardyń oiyndarynyń qalai jalǵasatyny qyzyqtyrady. Sol sebepti qazirgi jaǵdaidy eske salýdy jón dep sanaimyn», - dedi Qazaqstan fýtbol federatsiiasynyń bas hatshysy Azamat Aitqojin.
Onyń aitýynsha, Fýtboldan Qazaqstannyń barlyq quramasynyń, fýtzal jáne jaǵajai fýtbolynyń oiyndary pandemiianyń etek jaiýyna bailanysty keiinge qaldyrylǵan. Ári qarai ÝEFA, FIFA jáne BSWW tarapynan habarlandyrý keledi. Qazaqstandyq kásipqoilar men áýesqoilardyń chempionattarynyń oiyndary, kýbok týrnirleri, fýtzal men jaǵajai fýtbolynan el chempionatynyń kezdesýleri pandemiiamen qatar, elimizde qabyldanǵan tótenshe jaǵdaiǵa bailanysty keiinge shegerilgen.
Sondai-aq QFF men QKFL OLIMPBET Qazaqstan chempionatyn jalǵastyrýdyń eki nusqasyn qarastyrýda. Eń negizgisi eki ainalymnan turatyn jarys. Taǵy bir nusqa – biylǵy maýsymda «kúz-kóktem» júiesine aýystyrý týraly usynys.
