Qazaqstan ulttyq quramasynyń jartylai qorǵaýshysy Islambek Qýat «Orynbor» fýtbol klýbyna aýysty, dep habarlaidy "Ult aqparat".
Reseidiń premer-ligasynda óner kórsetetin «Orynbor» fýtbol klýby I.Qýatpen kelisimshartqa qol qoiylǵandyǵyn habarlady.
«Astana», «Oqjetpes», «Aqtóbe» klýbtarynda dop tepken Islambektiń 2014 jyldan beri Almatynyń «Qairatynda» oinaǵany belgili.
I.Qýat 2015 jyldan ulttyq qurama sapynda el namysyn da qorǵap keledi. Sol jyly 10 qazanda Niderlandy qaqpasyna alǵashqy golyn salǵan-tyn. Úsh kúnnen keiin Rigada Latviia quramasymen matchta jeńis golyn soǵyp, erekshe kózge tústi.
«Orynbor» fýtbol klýbyna erkin agent retinde aýysqan 26 jastaǵy I.Qýatty Transfermarkt.de saity 2 mln eýroǵa baǵalap otyr (sóitip ol atalmysh klýbtyń eń qymbat oiynshylarynyń birine ainaldy).
Islambekke jańa komanda quramyna sińisip ketý ońaiǵa túspesi anyq. «Orynbor» klýby týrnir kestesinde 18 týrdan keiin 19 upaimen 14-orynda keledi. Ótken maýsymda orynborlyqtar chempionatty jetinshi orynda aiaqtaǵan bolatyn. Endi biyl tómengi topqa túsip qalmaý úshin komanda baryn salatyny belgili.
Qazirgi kezde reseilik klýbtar qysqy demalysta. Osy qańtar aiynda oqý-jattyǵý jiyndarynan keiin 28 aqpanda kóktemgi týrlar bastalady.
