Frantsiia radikaldy ideialar taratqan 14 shetel azamatyn elden shyǵardy. Eldiń ishki ister ministri Jerald Darmanen 30 qazanda osylai dep málimdedi. Onyń sózine qaraǵanda, aldaǵy ýaqytta taǵy 18 adam elden deportatsiialanady.
Osyǵan deiin ishki ister ministrligi radikaldy ideia taratty degen kúdikke ilingen 4 myńnan astam shetel azamaty politsiia baqylaýynda ekenin aitqan. Bilik 200-den astamyn elden shyǵarýdy josparlap otyr.
Darmanenniń aitýynsha, 29 qazanda Nitstsa qalasynda úsh adamdy óltirgen Týnisten kelgen er adam osyǵan deiin frantsýz quqyq qorǵaý organdarynyń nazaryna ilinbegen jáne bilikten bosqyn mártebesin de suramaǵan. AFP agenttiginiń jazýynsha, ol qyrkúiek aiynyń sońynda Italiiaǵa teńiz arqyly jetken. Qazan aiynda Italiia biligi ony elden shyǵarýǵa tyrysqannan keiin Frantsiiaǵa barǵan.
29 qazanda Avinonda da shabýyl boldy. Pyshaǵy bar er adam ótip bara jatqan jolaýshylar men politseilerge qoqan-loqy kórsetken. Ol ustaý kezinde atyp óltirilgen.
16 qazanda Parij irgesinde 47 jastaǵy mektep muǵalimi Samiýel Pati kisi qolynan qaza tapty. Ol qazasynan biraz ýaqyt buryn sóz bostandyǵy týraly talqylaý kezinde oqýshylaryna Charlie Hebdo satiralyq basylymynyń Muhammed paiǵambar týraly karikatýrasyn kórsetken. Osydan keiin qoqan-loqy kóre bastaǵan muǵalim aqyry Máskeýde týǵan, 18 jastaǵy etnikalyq sheshen Abdýlah Anzorovtyń qurbanyna ainaldy. Anzorov muǵalimdi paiǵambardyń ar-namysyna tigeni úshin "darǵa asqanyn" aitqan.
Osydan soń Frantsiia prezidenti Emmanýel Makron shabýyldy "islamister teraktisi" dep atap, zaiyrly qoǵam qundylyqtaryn qorǵaýǵa shaqyrǵan. Makron málimdemesi birqatar musylman elderinde narazylyq týǵyzdy.
