Qazaqstan quramasy fizikadan eń bedeldi halyqaralyq bilim dodasynda el tarihyndaǵy eń úzdik nátijege qol jetkizdi. 2026 jylǵy 4-12 shilde aralyǵynda Kolýmbiianyń Býkaramanga qalasynda ótken 56-shy Halyqaralyq fizika olimpiadasynda (International Physics Olympiad, IPhO) ulttyq quramanyń bes múshesi de altyn medal jeńip aldy, dep habarlaidy ult.kz.
Biylǵy olimpiadaǵa álemniń 85 elinen 381 oqýshy qatysty. Qatysýshylar kúrdeli teoriialyq jáne eksperimenttik tapsyrmalardy oryndap, bilimderi men ǵylymi daiarlyqtaryn synǵa saldy. Qazaqstandyq jas fizikter joǵary daiyndyq deńgeiin kórsetip, bes altyn medal ielendi. Bul – Qazaqstannyń IPhO olimpiadasyna qatysý tarihyndaǵy eń úzdik nátije.
Altyn medal iegerleri:
- Egenbergenova Nurgúl – Astana qalasyndaǵy NURORDA mektep-litseiiniń 11-synyp oqýshysy;
- Azatbekov Amirbek – Astana qalasyndaǵy jaratylystaný-matematika baǵytyndaǵy NIS-tiń 12-synyp oqýshysy;
- Qazymbek Iliias – Astana qalasyndaǵy Spectrum International School mektebiniń 12-synyp oqýshysy;
- Cheremnov Roman – Almaty qalasyndaǵy «Miras» halyqaralyq mektebiniń 12-synyp oqýshysy;
- Qurman Damir – Astana qalasyndaǵy jaratylystaný-matematika baǵytyndaǵy NIS-tiń 11-synyp oqýshysy.
Bul tarihi jetistikke ulttyq qurama úsh jyl boiy júieli daiyndaldy. Komandany mektep muǵalimderi, tálimgerleri jáne ulttyq quramanyń jattyqtyrýshylary daiyndady. Daiyndyq jumystaryna ál-Farabi atyndaǵy Qazaq ulttyq ýniversitetiniń aǵa oqytýshysy, PhD doktory Gúliia Nurbaqova jetekshilik etti. Al Halyqaralyq fizika olimpiadasynda ulttyq quramanyń jumysyn SDU ýniversitetiniń aǵa oqytýshysy, PhD doktory Samat Maqsutov pen fizikadan halyqaralyq olimpiadalardyń júldegeri Alisher Erkebaev úilestirdi.
Aita keteiik, Halyqaralyq fizika olimpiadasy 1967 jyldan beri ótkizilip keledi. Qazaqstan bul bilim dodasyna 1997 jyldan beri turaqty qatysyp keledi. 2025 jyly ulttyq qurama eki kúmis jáne úsh qola medal jeńip alǵan bolsa, biyl elimizdiń bes oqýshysy da altyn medal ielenip, Qazaqstan tarihyndaǵy buryn-sońdy bolmaǵan nátijege qol jetkizdi.
Qazaqstannyń jas fizikterin, olardyń ustazdaryn, ata-analaryn jáne barsha qazaqstandyqtardy osy tarihi jeńispen quttyqtaimyz! Bul jetistik – daryndy jastardyń qajyrly eńbegi men ustazdardyń kásibi biliktiliginiń, sondai-aq elimizdegi olimpiadalyq daiarlyq júiesiniń joǵary deńgeiiniń jarqyn kórinisi.
