Filippin prezidenti Rodrigo Dýterte Davao qalasynyń meri bolǵan kezde esirtki satty degen kúdiktilerdi ózi óltirgenin málimdedi, - dep habarlaidy RIA Novosti jergilikti aqparat quraldaryna silteme jasap.
Mamyr aiynda prezident bolyp sailanǵan Rodrigo Dýterte esirtkige táýeldi adamdarmen, sondai-aq, esirtki satatyndarmen kúresip keledi. Politseilerdiń sońǵy málimetteri boiynsha, Dýterte bilikke kelgeli beri elde esirtki saýdasyna qatysy bar shamamen 3 myń adam óltirilgen.
"Men Davao qalasynda olardy ózim óltirgenmin. Muny istei alatynymdy sol jigitterge kórsetkim keldi", - dep málimdedi Filippin prezidenti.
"Davaoda mototsiklmen júrip, kóshelerde kúzette júrdim. Men rasynda da bireýdi óltirý úshin urys-qaǵys bolyp jatqan aýmaqtardy izdedim", - dedi Rodrigo Dýterte bul áreketin áli de jalǵastyra beretinin aita otyryp.
Aita keteiik, dúniejúzilik qoǵamdastyqtyń ókilderi eldegi esirtki saýdasynyń bul túrimen kúresý ádisin synǵa alǵan bolatyn. Adam quqyqtary jónindegi BUU sarapshylary da filippin biligindegilerdiń bul áreketin aiyptady. Sarapshylar olardy adamdardy óltirýge bóget jasaýlaryn jáne kúdiktilerdi ólim jazasyna kesýden bas tartýyn surady.
