Italiiada ataǵy keńge taraǵan jarys kólikterin shyǵaratyn Ferrari jáne Pirelli kompaniialarynyń ieleri koronavirýske bailanysty jedel járdem brigadalaryna volonter bolyp bardy, dep habarlaidy QazAqparat.
Formula1.com resmi saitynda Pirelli Motorsport basshysy Mario Izolanyń koronavirýsqa shaldyqqan adamdarǵa shuǵyl shyǵatyn brigadalardyń quramynda paramedik bolyp jumysqa ornalasqany jazylady.
«50 jastaǵy Izolanyń aiaq astynan dárigerlik qabilet paida boldy dep oilap qalmańyzdar. Ol jas kezinde paramediktiń oqýyn oqyǵan. Aýrý juqtyrý qaýpine qaramastan, Pirelli basshysy úide karantinde otyrmai, paramedikter komandasyna turaqty túrde kómegin berip turady», - delingen aqparatta.
Izola bir minýt ta oilanbastan jedel járdemde jumys isteýge keliskeni aitylady. Onyń birinshi aýysymy 5 sáýirde ótken. Árbir aýysym 10-12 saǵatqa sozylady.
Pirelli Motorsport basshysy bul ońai jumys emes ekenin moiyndaidy. «Óte aýyr. Bul virýs qaýipti, biz tilsiz jaýmen kúresip kelemiz. Árbir shyǵar kezde patsientterimizdi qosymsha qaýipten saqtaý úshin jedel járdem kóligin óńdep, jýyp-shaiýǵa 30 minýt ýaqyt ketiremiz», - deidi ol.
Al Ferrari komandasynyń burynǵy basshysy Maýritsio Arrivabene týǵan eli Italiiaǵa virýspen kúresýge kómektesip jatqanyn eshkimge jariia etpegen. M. Arrivabene salony sándi Ferrari-di jedel járdem kóligine aýystyrdy.
«Arrivabene virýs órshigen kezde jedel járdem kóligine otyrǵanyn eshkimge aitqan joq. Bir sózben aitqanda, ol onyń júrgizýshisi boldy!», - dep málim etken Italiia jýrnalisi Leo Týrrinige «Formýla 1» kompaniiasyndaǵy derekkóz.
Ferrari-di 2014-2019 jyldary basqarǵan Arrivabene óziniń aýyr minezimen tanylǵan eken.
«Burqyldaq bolsa da, júregi keń Arrivabene eshkimge eshteńe aitpaýdy uiǵardy. Alaida virýs órshigen kezden bastap ol jedel járdem kóligin júrgizip, egde jastaǵy adamdardy aýrýhanaǵa jetkizip júr», - dep jazǵan Il Resto del Carlino gazeti.
Búginde Italiiada koronavirýs infektsiiasyn juqtyrýdyń 210 700-den astam oqiǵasy tirkeldi. Indetten 29 myńǵa jýyq adam qaitys boldy.
