يتالييادا اتاعى كەڭگە تاراعان جارىس كٶلٸكتەرٸن شىعاراتىن Ferrari جەنە Pirelli كومپانييالارىنىڭ يەلەرٸ كوروناۆيرۋسكە بايلانىستى جەدەل جەردەم بريگادالارىنا ۆولونتەر بولىپ باردى, دەپ حابارلايدى قازاقپارات.
Formula1.com رەسمي سايتىندا Pirelli Motorsport باسشىسى ماريو يزولانىڭ كوروناۆيرۋسقا شالدىققان ادامدارعا شۇعىل شىعاتىن بريگادالاردىڭ قۇرامىندا پارامەديك بولىپ جۇمىسقا ورنالاسقانى جازىلادى.
«50 جاستاعى يزولانىڭ اياق استىنان دەرٸگەرلٸك قابٸلەت پايدا بولدى دەپ ويلاپ قالماڭىزدار. ول جاس كەزٸندە پارامەديكتٸڭ وقۋىن وقىعان. اۋرۋ جۇقتىرۋ قاۋپٸنە قاراماستان, Pirelli باسشىسى ٷيدە كارانتيندە وتىرماي, پارامەديكتەر كومانداسىنا تۇراقتى تٷردە كٶمەگٸن بەرٸپ تۇرادى», - دەلٸنگەن اقپاراتتا.
يزولا بٸر مينۋت تا ويلانباستان جەدەل جەردەمدە جۇمىس ٸستەۋگە كەلٸسكەنٸ ايتىلادى. ونىڭ بٸرٸنشٸ اۋىسىمى 5 سەۋٸردە ٶتكەن. ەربٸر اۋىسىم 10-12 ساعاتقا سوزىلادى.
Pirelli Motorsport باسشىسى بۇل وڭاي جۇمىس ەمەس ەكەنٸن مويىندايدى. «ٶتە اۋىر. بۇل ۆيرۋس قاۋٸپتٸ, بٸز تٸلسٸز جاۋمەن كٷرەسٸپ كەلەمٸز. ەربٸر شىعار كەزدە پاتسيەنتتەرٸمٸزدٸ قوسىمشا قاۋٸپتەن ساقتاۋ ٷشٸن جەدەل جەردەم كٶلٸگٸن ٶڭدەپ, جۋىپ-شايۋعا 30 مينۋت ۋاقىت كەتٸرەمٸز», - دەيدٸ ول.
ال Ferrari كومانداسىنىڭ بۇرىنعى باسشىسى ماۋريتسيو ارريۆابەنە تۋعان ەلٸ يتاليياعا ۆيرۋسپەن كٷرەسۋگە كٶمەكتەسٸپ جاتقانىن ەشكٸمگە جارييا ەتپەگەن. م. ارريۆابەنە سالونى سەندٸ Ferrari-دٸ جەدەل جەردەم كٶلٸگٸنە اۋىستىردى.
«ارريۆابەنە ۆيرۋس ٶرشٸگەن كەزدە جەدەل جەردەم كٶلٸگٸنە وتىرعانىن ەشكٸمگە ايتقان جوق. بٸر سٶزبەن ايتقاندا, ول ونىڭ جٷرگٸزۋشٸسٸ بولدى!», - دەپ مەلٸم ەتكەن يتالييا جۋرناليسٸ لەو تۋررينيگە «فورمۋلا 1» كومپانيياسىنداعى دەرەككٶز.
Ferrari-دٸ 2014-2019 جىلدارى باسقارعان ارريۆابەنە ٶزٸنٸڭ اۋىر مٸنەزٸمەن تانىلعان ەكەن.
«بۇرقىلداق بولسا دا, جٷرەگٸ كەڭ ارريۆابەنە ەشكٸمگە ەشتەڭە ايتپاۋدى ۇيعاردى. الايدا ۆيرۋس ٶرشٸگەن كەزدەن باستاپ ول جەدەل جەردەم كٶلٸگٸن جٷرگٸزٸپ, ەگدە جاستاعى ادامداردى اۋرۋحاناعا جەتكٸزٸپ جٷر», - دەپ جازعان Il Resto del Carlino گازەتٸ.
بٷگٸندە يتالييادا كوروناۆيرۋس ينفەكتسيياسىن جۇقتىرۋدىڭ 210 700-دەن استام وقيعاسى تٸركەلدٸ. ٸندەتتەن 29 مىڭعا جۋىق ادام قايتىس بولدى.
