Facebook áleýmettik jelisi Afrikadaǵy Mozambik, Kamerýn, Sýdan men Liviia aýmaǵynda Reseidi nasihattaidy degen úsh jelini óshirip tastady. Bul aqparatty The New York Times gazeti taratty.
Facebook joiylǵan akkaýnttardyń naqty sanyn kórsetpese de, olardyń "trollder fabrikasy" deitin atpen jaqsy tanys Reseidiń "Internet-zertteý agenttigimen" bailanysy bar ekenin aitqan. Agenttikti reseilik jáne halyqaralyq BAQ prezident Vladimir Pýtinniń jaqyn dosy Evgenii Prigojin qarjylandyratynyn kópten beri aityp júr. Buǵan deiin AQSh Prigojinge "sailaýǵa aralasý isi" boiynsha sanktsiia salǵan.
Facebook Reseidiń Afrikadaǵy yqpal etýshi kampaniiasyn Stenford internet-observatoriiasymen birigip anyqtaǵan jáne onyń 2016 jylǵy AQSh-taǵy balamasyna uqsamaitynyn baiqaǵan. Iaǵni, arab tilinde jazylǵan habarlama birden túrli elge taraǵan ári feik akkaýnttardyń kóbin jergilikti turǵyndar ashqan. Facebook ol turǵyndarǵa belgili bir somada aqsha tólengen dep esepteidi.
Budan bólek AQSh-taǵy akkaýnttar 2016 jylǵy sailaý qarsańynda kúnine 2,5 myń post jazyp otyrsa, Afrikadaǵy akkaýnttar qazan aiynda ǵana 9 myń post jariialaǵan. Olardyń birazy aýmaqta Resei saiasatyn dáriptegen jáne AQSh pen Frantsiiany synap otyrǵan.
Resei Afrikaǵa yqpalyn birneshe jyldan beri únemi kúsheitip keledi. Aqparat quraldary ol jaqta "Vagner" áskeri kompaniiasy jumys isteitinin aityp júr. Jýrnalister kompaniiany Evgenii Prigojinmen bailanystyrady.
Byltyr jazda Ortalyq Afrika respýblikasynda osy áskeri kompaniiany zertteýge barǵan reseilik jýrnalisterdi belgisiz bireýler óltirip ketken.
