Boliviianyń eks-prezidenti Evo Morales sársenbi kúni eldegi saiasi daǵdarysty beibit jolmen sheshýge shaqyryp, ol úshin qaityp barýǵa daiyn ekenin aitty, dep habarlaidy TASS agenttigi.
«Eger meniń qatysýym arqyly ozbyrlyqty toqtatyp, adam ómirin saqtaityn beibit sheshimge (daǵdarysqa) úles qosa alsam, men ony súiikti Boliviiam úshin jasaimyn», - dep jazdy ol Twitter-degi paraqshasynda.
Ol barlyǵyn «qoǵamdyq qozǵalystar, azamattyq uiymdar men saiasi partiialar qatysatyn dialogqa» shaqyrdy.
Eske sala keteiik, burynǵy prezident Morales Boliviiany tastap, Meksikadan saiasi baspana tapqan bolatyn. Sebebi onyń ómirine qaýip tónip turǵan edi.
Morales jeksenbi kúni prezident sailaýynyń daýly nátijeleri boiynsha birneshe aptaǵa sozylǵan narazylyqtan keiin otstavkaǵa ketken bolatyn. Ol ketýge májbúr bolǵanyn, muny «elde endi qantógis bolmas úshin» erikti túrde jasaǵanyn aitty. Eldiń qarýly kúshi, oppozitsiiasy men kásipodaqtary onyń otstavkaǵa ketýin surady.
Keiin Boliviia oppozitsiiasynyń senatory Janin Anes ózin eldiń ýaqytsha prezidenti dep jariialady.
Morales Anestiń ýaqytsha prezident bolatyny týraly málimdemesin aiyptap, Twitter-degi resmi paraqshasynda «bul - tarihtaǵy eń aram jáne abyroisyz tóńkeris» dep jazǵan bolatyn.
