Eýropa Parlamentiniń depýtaty Andris Ameriks Belgiiadaǵy «QazAqparat» tilshisine bergen suhbatynda Qazaqstan halqyn Naýryz meiramymen quttyqtady.
«Qazaq halqyn jáne basshylyǵyn Naýryz merekesimen quttyqtaý men úshin úlken qurmet ári shynaiy qýanysh.
Qys ketip, kóktem kelgende, tabiǵat jańa ómirge oianǵanda, Kún sáýlesi úige ǵana emes, adamdardyń júregine de jetkende, sizder kóktem merekesi – Naýryzdy atap ótesizder. Bul mereke sizder úshin erekshe, óitkeni ol jańa jyldy, jańa múmkindikter ashatyn jańa bastamany bildiredi.
Búkil álem qiyn-qystaý kezeńderdi bastan keshirip jatqan ýaqytta kez kelgen jańa bastama bárimiz úshin úlken ózgeristiń belgisi bolmaq. Meniń oiymsha, qazir adamdarǵa eń qiyny artta qaldy jáne aldymyzda bizdi jarqyn bolashaq kútedi deitin ýaqyt keldi.
Barsha halqyńyzdy Naýryz merekesimen shyn júrekten quttyqtaimyn jáne elińizdiń ár azamatynyń úii kóktemgi kún sáýlesimen jylynyp, júrekterinde jańa kúnge artar úmittiń búrshik atýyn tileimin.
Eýropalyq Odaq úshin Qazaqstan – yntymaqtastyq úshin jaqyn jáne senimdi seriktes jáne bizdiń qarym-qatynasymyzdyń serpini qarqyndy damýda. Sondyqtan Eýroparlament, Qazaqstan halqy men basshylyǵy arasyndaǵy yntymaqtastyq odan ári tyǵyz ári tiimdi bolatynyna senimdimin.
Qazaqstandyqtarǵa budan ári de uly jáne gúldengen el qurýdy, al Qazaqstan basshylyǵyna baiyrǵy danalyqty, pozitivti oilaýdy jáne Qazaqstandy damytý úshin mańyzdy sheshimder qabyldaýda altyn orta taba bilýdi shyn júrekten tileimin», – dep atap ótti Eýropalyq parlamenttiń depýtaty, EO-Qazaqstan, EO-Qyrǵyzstan, EO-Tájikstan jáne EO-Ózbekstan, sondai-aq Túrkimenstanmen jáne Mońǵoliiamen (DCAS) qatynastar jónindegi parlamenttik yntymaqtastyq komitetterindegi delegatsiia tóraǵasynyń orynbasary Andris Ameriks.
