Qazaqstan Respýblikasy Táýelsizdiginiń 30 jyldyǵy men Túńǵysh Prezident kúnin merekeleý qurmetine Eýropanyń ejelgi kinoteatrynda «Juldyzdar toǵysqanda» filminiń kórsetilimi ótti, dep habarlaidy QazAqparat.
Sharany Strasbýrg qalasyndaǵy QR Bas konsýldyǵy Frantsiiadaǵy Qazaqstan kinosy kinofestival qaýymdastyǵymen birlesip, 1913 jyldan beri jumys istep kele jatqan «Odissei» kinoteatrynda uiymdastyrdy.
Frantsiianyń Úlken Shyǵys aimaǵynyń jáne Strasbýrg qalasynyń resmi tulǵalary, Eýropa Keńesiniń ókilderi, Eýropa Parlamentiniń depýtattary, shet el elshileri men diplomattary, frantsýz stýdentteri men jýrnalisteri Qazaqstannyń kópǵasyrlyq damý tarihymen, qazaq memleketin qalyptastyrýdyń mańyzdy kezeńderimen tanysty.
Bas konsýl Ánýarbek Ahmetov óz sózinde sheteldik qonaqtarǵa osy kinofilmde erekshe kórsetilgen Táýelsiz Qazaqstannyń qalyptasýyndaǵy Tuńǵysh Prezident – Elbasy Nursultan Nazarbaevtyń róli týraly aityp berdi.
2019 jylǵy maýsymda sailanǵan Qazaqstan Prezidenti Qasym-Jomart Toqaev qazirgi ýaqytta respýblikanyń odan ári demokratiialyq damýyna baǵyttalǵan aýqymdy saiasi jáne áleýmettik-ekonomikalyq reformalar júrgizip jatqany atap ótildi.
Sondai-aq, qonaqtar Qazaqstannyń táýelsizdik jyldaryndaǵy saiasi, ekonomikalyq jáne mádeni-gýmanitarlyq damý salasyndaǵy jetistikterine arnalǵan fotosýret kórmesimen tanysty.
