Qazaqstandyq Air Astana áýe kompaniiasy eýropalyq áýejailardan keletin reisterde bagaj berýdiń keshigetinin eskertti, dep habarlaidy QazAqparat Air Astana baspasóz qyzmetine silteme jasap.
Jazǵy navigatsiianyń bastalýymen Eýropanyń áýe ailaqtary qyzmetkerler jetispeýshiligine tap boldy, óitkeni olar pandemiia kezinde qysqarǵan bolatyn jáne reisterge qyzmet kórsetýde qiyndyqtar týyndady.
Bul qiyndyqtar jolaýshylarǵa qyzmet kórsetýge de, bagajdy óńdeýge de bailanysty.
Saldarynan sońǵy birneshe aptada túrli aviakompaniialardyń júzdegen jolaýshysy bagajyn birneshe saǵat kútýge májbúr boldy.
Al keibir saiahatshylar áli ala almai keledi. Mysaly, Frankfýrt áýejaiynda shamamen 12 myń júk áli berilgen joq, onyń arasynda qazaqstandyq aviakompaniia jolaýshylarynyń bagajdary da bar.
«Áýe kompaniiasy eýropalyq áýejailardan, atap aitqanda Frankfýrt áýejaiynan keletin jolaýshylardan bagaj kútýde túsinistik pen tózimdilik tanytýdy suraidy. Júkti tez arada jetkizý úshin bar kúshimizdi salamyz. Bagaj máselesi boiynsha ótinishti help.airastana.com portalyna jazýǵa bolady. Air Astana eýropalyq áýejailardaǵy fors-major saldarynan týyndaǵan qolaisyzdyq úshin keshirim suraidy», - delingen baspasóz qyzmetiniń habarlamasynda.
