Búgin UEFA Eýropa ligasynda finalǵa shyqqan ekinshi komanda belgili boldy, dep habarlaidy "Ult aqparat".
Jartylai finaldyń ekinshi kezdesýinde Italiianyń «Inter» jáne Ýkrainanyń «Shahter» komandalary sheberlik baiqasty. Oiyn tartysty ótti deýge negiz bar. Ekeýi de shabýylǵa kóbirek shyǵyp, qyzý oiyn ótkizdi.
Dese de birinshi kezeńde «Inter» komandasynyń joly boldy. Oiynnyń 19-minýtynda Laýtaro Martines ýkrain qorǵaýshylarynyń qateligin sheber paidalanyp ketti. Budan keiin qos komanda tarapynan da esepti ózgertetin birneshe múmkindik kezdesti. Alaida tablodaǵy esep sol kúiinshe ózgerissiz qaldy.
Ekinshi kezeńde «Shahterdiń» qaqpasyna taǵy da tórt gol soǵyldy. Ony Danilo D'Ambrozio 64, Laýtaro Martines 74, Romelý Lýkaký 78, 83-minýttarda qaqpaǵa engizdi. Osylaisha «Inter» 5:0 esebimen jeńiske jetti.
Budan buryn finalǵa Ispaniianyń «Sevilia» komandasy joldama alǵan bolatyn. Ol 16 tamyzda Angliianyń «Manchester Iýnaited» komandasynan 2:1 esebimen basym túsken bolatyn.
Final 21 tamyzda Kioln qalasyndaǵy «Rein Energi» stadionynda bolady.
