Dál qazir elordada UEFA Eýropa ligasy úshinshi irikteý satysyndaǵy «Astana» men Maltanyń «Valletta» komandalarynyń alǵashqy kezdesýi aiaqtaldy, dep habarlaidy QazAqparat tilshisi.
«Astana» sapynda birinshi minýttan Nenad Erich, Antonio Rýkavina, Lýka Shimýnovich, Evgenii Postnikov, Dmitrii Shomko, Iýrii Logvinenko, Ivan Maevskii, Rýnar Mar Sigýronsson, Dorin Rotariý, Firmin Mýbele jáne Marin Tomasov shyqty.
Al «Valletta» quramynda Anri Bonello, Raian Kamilleri, Jan Borg, Enmi Penia, Djozef Zerafa, Dýglas Paker, Roýen Mýskat, Iýri, Mario Fontanella, Kirian Nvoko jáne Kevin Týlimeri oinady.
Match «Astananyń» basymdyǵymen ótti. Kezdesýdiń negizgi bóliginde bizdiń jigitter qaqpany torýyldady. Nátijesinde astanalyq shabýylshy Rýnar Mar Sigýronsson 8-minýtta esep ashty. Al 15-minýtta Iýrii Logvinenko esepti ústemelei tústi. Kezdesýdiń 35-minýtynda Marin Tomasov qaqpashymen betpe-bet shyǵyp,bul múmkindikti múlt jibergen joq.
Ekinshi kezeńde de «Astana» basymdyǵyn baiqatty. Bizdiń komanda sapynan 57-minýtta Rýnar Mar Sigýronsson kezdesý barysyndaǵy ekinshi golyn soqty. Budan keiin «Valletta» sapynan Mario Fontanella 67 minýtta esep aiyrmasyn qysqartqan edi. Kezdesý núktesin 80-minýtta elordalyq shabýylshy Rangelo Ianga qoidy. Osylaisha «Astana» qarsylasyn 5:1 esebimen tize búktirdi.
«Valletta» komandasy Maltanyń belgili klýbtarynyń biri sanalady. Búgingi kúnge deiin «Valletta» Malta birinshiliginde 25 márte chempion atanyp úlgerdi.
Qarymta kezdesý 15 tamyzda Maltada ótkiziledi.
Esterińizge sala ketelik, bul jupta jeńimpaz atanǵan komanda Eýropa ligasy plei-off satysynda «Saraevo» (Bosniia jáne Gertsegovina) jáne BATE (Belarýs) jubynyń jeńimpazymen kezdesedi.
