Eýropa elderi týristerdi qabyldaýǵa daiyndalyp jatyr, dep habarlaidy Euronews agenttigi.
Máselen, Ispaniiadaǵy epidemiologiialyq jaǵdai 8 maýsymnan keiin fýtboldan ulttyq chempionatty bastap, al jazda sheteldik týristerdi qabyldaýǵa múmkindik berip otyr.
Bul týraly eldiń premer-ministri Pedro Sanches málim etken. «La Liga» basshylyǵy aldaǵy kúnderi naýryz aiynda pandemiia saldarynan toqtatylǵan jarys oiyndarynyń kestesin kelisýdi josparlap otyr. Úkimet basshysy osy arada týristik maýsymnyń ashylýyna qarsy meiramhanalar, qonaqúiler men jaǵajailardy daiyndaýǵa shaqyrdy.
«Ispaniia jyl saiyn 80 millionnan astam qonaqty qabyldaidy. Shilde aiynan bastap sheteldik týrister elge qaýipsiz jaǵdaida kele alatynyn jariialaimyn. Osy kezden bastap, sheteldik týrister elimizde demalysyn josparlai alady», - dedi ol.
Al Italiia Eýroodaq elderinen keletin týristerdi resmi túrde 3 maýsymnan qabyldaýǵa ázir. Munda murajailar jumysyn bastaýda. Beisenbi kúni – Kolizei, odan keiin Florentsiiadaǵy Ýffitsi galereiasy ashylady. 1 maýsymnan bastap biletterin brondaǵan kelýshiler Vatikan murajailaryn tamashalai alady. Grekiia eli de týristerdiń aǵynyna daiyndyq ústinde.
Endi, epidemiologiialyq ahýaly jaqsy memleketterdiń týristeri bul elge koronavirýsqa test tapsyrmai jáne karantinge oqshaýlaýsyz kele alady. Horvatiia úkimeti óz týristeri úshin shekarany 15 maýsymnan keiin ashady. Frantsiia biligi ishki týrizmniń mańyzyn erekshe atap ótýde. Eldiń premer-ministri Edýar Filipp týrizm sektoryna qatysty josparlardy kelesi aptada usynýdy ýáde etti.
Germaniiada da karantin sharalary bara-bara jumsaryp keledi. Kantsler Angela Merkel el azamattaryn asyqpai ári erekshe saqtyqpen áreket etýge shaqyrdy. Eýropada koronavirýs juqtyrýdyń 2 millionnan astam oqiǵasy tirkelgen, 170 myńǵa jýyq adam qaitys boldy. Sońǵy málimetke sáikes, álemde indetke shaldyqqandardyń jalpy sany 5,5 millionǵa jýyqtady.
