Eýropa Odaǵy adam quqyǵy salasynda AQSh-tyń "Magnitskii aktisine" uqsas qujat negizinde sanktsiia mehanizmin jasaýdy josparlap otyr. Bul aqparatty Eýroodaqtyń syrtqy ister jáne qaýipsizdik saiasaty jónindegi joǵarǵy ókili Jozep Borrel málimdedi.
Onyń aitýynsha, sanktsiia rejiminiń aýqymy "keń", Eýroodaq basshylary ideiany bir aýyzdan maquldaǵan. Jaqyn arada Eýroodaqtyń syrtqy ister jáne qaýipsizdik saiasaty boiynsha qyzmeti qajet qujattardy ázirlei bastaidy.
"Magnitskii aktisin" AQSh Kongresi 2012 jyldyń sońynda qabyldaǵan. Bul qujat 2009 jyly Máskeý abaqtysynda qaza tapqan Hermitage Capital qorynyń zańgeri Sergei Magnitskiidiń qurmetine osylai atalyp ketken. Magnitskii Resei biýdjetinen iri kólemde qarjy jymqyrý aila-sharǵysyn áshkerelegen. Resmi derek boiynsha, Magnitskii tergeý izoliatorynda júrek aýrýynan qaitys bolǵan. Quqyq qorǵaýshylar tergeý izoliatory qasaqana túrde Magnitskiidiń emdelýine múmkindik bermedi dep sanaidy jáne onyń óliminiń shynaiy sebebin jasyrdy dep kinálaidy.
AQSh kongresi qabyldap, keiinirek keńeitilgen zańda "adam quqyǵyn buzý jáne jemqorlyqqa qatysy bar" adamdarǵa ekonomikalyq sanktsiia salý jáne viza bermeý jaǵy qarastyrylǵan. Buǵan uqsas quqyqtyq akti Ulybritaniia, Kanada, Estoniia, Latviia jáne Litvada qabyldanǵan.
