Eýroodaq Belarýs áýe kompaniialarynyń reisin qabyldaýdan resmi túrde bas tartty. Mundai sheshimdi juma kúni Briýsselde Eýroodaq elderiniń elshileri resmi túrde bekitti.
23 mamyrda Ryanair ushaǵy Minskige májbúrli túrde qondyrylyp, ushaqta bolǵan oppozitsiialyq bloger Roman Protasevich pen onyń júrip júrgen qyzy Sofiia Sapega ustalǵan edi. Eýroodaq osyǵan jaýap retinde atalǵan shekteýdi engizip otyr. EO Minskini Aleksandr Lýkashenko rejiminiń synshysy Protasevichti ustaý úshin ekipaj múshelerin aldap, qondyrdy dep aiyptaidy.
Is júzinde Belarýstiń memlekettik "Belavia" áýe kompaniiasynyń Eýroodaq elderine ushpaǵanyna bir aptadan asty. Odaqqa múshe elderdiń basym bóligi olardyń ushyp kelýine tyiym salǵan.
Resei men shyǵysqa qarai ushatyn Eýropanyń áýe kompaniialary qazir Belarýstiń áýe keńistigin ainalyp ushyp júr. Eýroodaq jetekshileriniń sammitinde osyndai rekomendatsiia berilgen. Qaǵaz júzinde mundai sheshim bekitilmegenmen Eýroodaq áýe kompaniialarynyń barlyǵy rekomendatsiiaǵa boiusynǵan. Ózge elder de "Belavia" ushaqtaryn qabyldaýdan bas tartqan.
Belarýs áýe kompaniiasy da kúzge deiin Eýroodaqqa ushpaitynyn habarlaǵan. Qazir ol Resei, Túrkiia jáne ózge elderge ushyp jatyr.
- Eýroodaq elderi Protasevichtiń ustalýyna bailanysty Minskige jańa sanktsiia salý múmkindigin qarastyryp jatyr. Belarýstiń memlekettik telearnasy beisenbi kúni Protasevichpen bir jarym saǵattyq suhbat jariialady. Videoda oppozitsiialyq jýrnalist "jappai tártipsizdik uiymdastyrǵanyn" moiyndap, oppozitsiianyń birqatar ókilderin synaidy. Lýkashenko qarsylastary video qysymmen túsirilgen dep sanaidy.
