Astanada Euronews halyqaralyq jańalyqtar arnasynyń qazaq tilinde aqparat taratýyna orai resmi tanystyrylym ótti, dep habarlaidy ult.kz.
Qazaq tili Euronews arnasynda turaqty habar taratylatyn 14 tildiń qataryna qosyldy. Bul – Ortalyq Aziia halyqtarynyń tilderi arasynda alǵash ret júzege asqan bastama.
Tanystyrylymǵa Qazaqstan Respýblikasy Mádeniet jáne aqparat birinshi vitse-ministri Qanat Ysqaqov, Euronews direktorlar keńesiniń tóraǵasy Pedro Vargas David jáne Euronews agenttiginiń Astanadaǵy biýro jetekshisi Boian Brkich qatysty.
Is-shara barysynda Mádeniet jáne aqparat birinshi vitse-ministri Qanat Ysqaqov bul jobanyń memlekettik tildiń qoldanys aiasyn keńeitýge, otandyq aqparat keńistigin damytýǵa jáne qazaqtildi aýditoriianyń halyqaralyq sapaly aqparat tutynýyna yqpal etetinin atap ótti.
«Euronews telearnasynyń qazaq tilindegi aqparat tarata bastaýy – elimizdiń aqparat keńistigi úshin aitýly oqiǵa. Álemdegi jetekshi halyqaralyq jańalyqtar arnalarynyń biri alǵash ret Qazaqstannyń memlekettik tilinde halyqaralyq jańalyqtardy turaqty túrde usynatyn bolady», – dedi Qanat Ysqaqov.
Óz kezeginde Euronews direktorlar keńesiniń tóraǵasy Pedro Vargas David qazaq tilindegi jańalyqtardyń iske qosylýy arnanyń kóptildi habar taratý aiasyn keńeitýge jáne álemniń ár túkpirindegi aýditoriiaǵa táýelsiz halyqaralyq aqparatqa erkin qol jetkizýine baǵyttalǵan ustanymynyń aiqyn kórinisi ekenin aitty.
«Qazaqstan – Ortalyq Aziiadaǵy negizgi seriktesterimizdiń biri. Osy jobany júzege asyrýǵa kórsetken qoldaýy úshin Qazaqstan Respýblikasynyń Úkimetine alǵysymyzdy bildiremiz. Ekijaqty áriptestigimiz aldaǵy ýaqytta da tabysty jalǵasatynyna senimdimin», – dedi Pedro Vargas David.
Joba kezeń-kezeńimen júzege asyrylady. Alǵashqy kezeńde qazaq tilindegi jańalyqtar jumys kúnderi Euronews-tiń YouTube arnasynda jariialanyp turady. Aldaǵy ýaqytta qazaq tilindegi jańalyqtar ózge de mediaplatformalarda, onyń ishinde teleefirde de kezeń-kezeńimen kórermenge jol tartady.
Sondai-aq Euronews halyqaralyq jańalyqtarynyń shamamen 90 paiyzy qazaq tiline beiimdelip usynylady.
Sonymen qatar 6-8 shilde aralyǵynda Astanada Euronews-tiń Aziia elderindegi redaktsiialarynyń alǵashqy óńirlik seminary ótip jatyr. Qatysýshylar óńirlik redaktsiialar arasyndaǵy áriptestikti nyǵaitý, kásibi tájiribe almasý jáne Euronews jelisiniń Aziiadaǵy jumys aiasyn keńeitý máselelerin talqylaýǵa bas qosty.
Eske salaiyq, Euronews-tiń Astanadaǵy keńsesi 2024 jyldyń kúzinde jumysyn bastady. Búginde ol halyqaralyq telearnanyń jergilikti baǵdarlamalaryn ázirleitin ári álemniń túkpir-túkpirine taratylatyn óńirlik kontentti daiyndaityn mańyzdy ortalyqtyń qyzmetin atqaryp keledi.
