Halyqaralyq kinofestivalge Gollivýd juldyzdary qatysýy múmkin. Bul týraly Eýraziia kinofestivaliniń tóraǵasy Ermek Tursynov aitty, dep habarlaidy Sputnik Qazaqstan.
Onyń aitýynsha, kinofestivalde 6 sektsiia bolady: halyqaralyq baiqaý, qysqametrajdy filmder baiqaýy, "Eýraziia júreginen", "Obektiv", "Airyqsha kórsetilim", "Netpak tańdaýy". Alǵashqy ekeýi negizgi konkýrstyq sektsiia bolyp sanalady.
"Tosyn syi jasaǵaly jatyrmyz. Gollivýd juldyzdarymen kólissózder júrgizilýde. Sondai-aq, festivalge otandyq jáne sheteldik kino salasynyń ókilderi qatysady. Atap aitqanda, Netflix, Fox, Columbia pictures sekildi kinokompaniialardyń mamandary bolady", - dedi kinofestival tóraǵasy.
Tursynovtyń aitýynsha, buǵan deiin sheteldik juldyzdar Qazaqstanda qyzyl kilemmen ótip, tek qonaq bolyp ketetin. Endi olar otandyq kino óndirisiniń damýyna úles qosatyn bolady.
"Olarmen otandyq kino ónerine úlesin qosatyndai jobalardy qarastyryp jatyrmyz. Tanymal kino prodiýserler ózderiniń tájiribelerimen bólisip, sheberlik saǵattaryn ótkizetin bolady", - dedi Eýraziia kinofestivaliniń tóraǵasy.
Brifing barysynda mádeniet jáne sport ministrligi mádeniet jáne óner isteri departamentiniń direktory Ábil Jolamanov biylǵy kino festivalge alǵash ret Frantsiia, Ulybritaniia, Resei, Izrail, Makedoniia elderiniń kinosheberleri qatysatynyn atap ótti.
Sonymen qatar ulttyq kinony qoldaý memlekettik ortalyǵynyń basqarma tóraǵasy Andrei Hazbýlatov ta halyqaralyq sharada tanymal juldyzdardyń bolatynyn atap ótti.
"Gollivýd juldyzdary bolady. Kimdi shaqyratynymyzdy aldaǵy ýaqytta aitamyz. Qazir olarmen kelissózder júrgizilip jatyr", - dedi ol.
Kinofestifalge júzden asa film túsken, onyń 56-sy baiqaýǵa qatysady.
Aita keteiik, halyqaralyq Eýraziia kinofestivali Nur-Sultan qalasynda 30 maýsymnan 6 shilde aralyǵynda ótedi.
