Jyl basynan beri elordada esirtki qylmysyna qatysty 800-den astam adam qylmystyq jaýapkershilikke tartyldy. Bul týraly Nur-Sultan qalalyq politsiia departamenti Esirtki qylmysyna qarsy is-qimyl bóliminiń bastyǵy Sergei Ilinyh aitty, dep habarlaidy QazAqparat.
«Sýret, graffiti salý qylmystyq áreketine jastar, stýdentter tartylady. Olar tipti mundai áreketteri úshin qylmystyq jaýapkershilikke tartylatyndyqtaryn da bilmeitinderi bar. Japsyrmalar, sýretter qaldyratyndardyń kópshiligine, jastarǵa 6 jylǵa deiin bas bostandyǵynan aiyrý jazasy kózdelgen. Mundai áreketter túngi ýaqytta beine baqylaý kamerasy joq jerlerde jasalady. Qazirgi ýaqytta ákimdikpen, aýdandardyń ákimdikterimen birlesip, qalanyń barlyq bóligin tsifrlandyrý júrgizilýde. Bul jastar jazbalar men esirtki jasyratyn oryndar qaldyrmaýy úshin jasalyp jatyr», - dedi Sergei Ilinyh.
Onyń atap ótýinshe, esirtki kýrerine, esirtki zattaryn jasyryn orynǵa qoiyp ketetin adamdarǵa 25 jylǵa deiin bas bostandyǵynan aiyrý jáne múlkin tárkileý jazasy kózdelgen. Jaza merzimi esirtki zatynyń salmaǵyna, qylmystyń aýyrlyǵyna bailanysty bolmaq.
Jalpy, jyl basynan beri elorda aýmaǵynda esirtkiniń zańsyz ainalymy faktisimen 800-den astam adam qylmystyq jaýapkershilikke tartyldy. Kún saiyn qalada ortasha eseppen 3 adamnyń ústinen esirtki qylmysyna bailanysty is qozǵalady
