Jyl basynan beri el kóleminde esirtki túrlerin nasihattaǵan 875 internet resýrs anyqtalyp, buǵattaldy. Bul týraly QR Ishki ister ministrliginiń Esirtki qylmysyna qarsy is-qimyl departamentiniń basshysy, politsiia polkovnigi Erlan Omarbekov málim etti, dep habarlaidy QazAqparat.
«Ishki ister organdary internet keńistigine monitoringti turaqty túrde júrgizip turady. Onyń barysynda esirtki, psihotroptyq jáne basqa da tyiym salynǵan zattardy taratýǵa qatysty aqparattar anyqtalyp jatady. Esirtkige qatysty aqparattardyń formaty ártúrli. Atap aitqanda, beiresmi saittar, posttar, blogtar jáne jarnamalyq habarlandyrýlar. Jyl basynan beri esirtki jarnamalaǵan 875 internet resýrs anyqtalyp, buǵattaldy», - dedi Erlan Omarbekov.
Onyń aitýynsha, elimizde esirtkini jarnamalaýshy saittardyń basym bóligi sheteldik domenmen tirkelgen.
«Ókinishke qarai, sheteldik domenmen tirkelgen esirtki jarnamalaýshy internet resýrstardyń jolyn kesý ońai emes. Sol siiaqty ony uiymdastyrýshylardy jaýapkershilikke tartý jaǵy da qiynǵa soǵyp otyr. Jalpy alǵanda elimiz boiynsha esirtkini internet arqyly nasihattaýdyń aldyn alý máselesi erekshe nazarda. Anyqtalǵan internet resýrstardyń respýblika aýmaǵynda qyzmetin toqtatyp, buǵattaý úshin biz derekterdi Aqparat jáne qoǵamdyq damý ministrligine jiberemiz», - deidi ol.
