Qazaqstandyq Erjan Maksim reseilik "Golos. Deti" telejobasynda ekinshi oryn aldy, dep habarlaidy "Ult aqparat".
"Golos. Deti" mýzykalyq baiqaýynyń finalynda Erjan Maksim Dimash Qudaibergen aityp júrgen keremet án – "All by Myself-ti" oryndap, kórermenderdi tánti etti.
Finalǵa tálimgerler Pelageia, Valerii Meladze jáne Svetlana Lobodanyń komandasynyń árqaisysynan úsh-úshten, barlyǵy toǵyz úmitker shyqqan-tyn.
Sýperfinalǵa joldama alǵandar kórermenderdiń daýys berýi arqyly anyqtaldy.
Alǵashqy bolyp Pelageia komandasynyń ánshileri sahnaǵa shyqty. Mariam Abdelkader, Valerii Kýzakov jáne astrahandyq Renata Tairova óz ónerlerin sarapqa saldy. Osy úsheýiniń ishinen 10 jasar V.Kýzakov kórermenderdiń kóp daýysyna ie boldy.
Ekinshi Valerii Meladzeniń komandasynda ivanovolyq 14 jasar Anastasiia Sisaýri, Stepanakert qalasynan kelgen 10 jasar Mihail Grigorian jáne 11 jasar qazaqstandyq Erjan Maksim óner kórsetti. E.Maksim Erik Karmenniń «Sam po sebe» ánin oryndady. Sodan keiin úsh úmitker tálimgerimen qosylyp, Konstantin Meladzeniń «Sera» ánin áýeletti.
V.Meladze úsheýiniń de ónerin joǵary baǵalap, sáttilik tiledi. Al, kórermender tańdaýy qazaqstandyq ánshige tústi.
Budan keiin Svetlana Lobodanyń tobyndaǵy Mikella Abramova, Nino Chesner jáne Robert Bagratian sahna tórine kóterildi. Munda ataqty ánshi Alsýdyń qyzy, 10 jasar M.Abramova ozdy.
Sonymen, sýperfinalda eń myqtylar - V.Kýzakov, E.Maksim jáne M.Abramova baq synady. Erjan «Adajio» ánimen shyqty.
"Birinshi arnanyń" tikelei efirinde ótken baiqaýdyń jeńimpazy kórermenderdiń daýys berýiniń qorytyndysy boiynsha anyqtaldy. Aita ketý kerek, jobanyń erejesi boiynsha tek Resei turǵyndary ǵana daýys bere aldy. Sóitip, "Golos. Deti" jobasynda 10 jastaǵy Mikella Abramova jeńiske jetti. Mikella - belgili reseilik ánshi Alsý men biznesmen Ian Abramovtyń qyzy.
Erjan men Valerii vitse-chempion boldy. Tálimgerlerdiń arasynan Pelageia úzdik shyqty.
Biraq kórermender baiqaýda ádiletsizdik bolǵanyn jarysa jazyp jatyr. Olar naǵyz jeńimpaz Erjan ekenin aityp, oǵan qoldaý bildirýde. "Aqshaǵa satyp aldy", "Erjan, sen jeńdiń, kórermenderdiń súiispenshiligin eshqandai aqshaǵa satyp ala almaisyń", "Keremet óner kórsettiń, men jyladym", "Alsý, uiat jasadyń", "Birinshi arnada ádildik joq", "Qamyqpa, Erjan, seniń bolashaǵyń zor" dep reseilikter de, qazaqstandyqtar da Erjannyń videolarynyń astyna pikir qaldyryp jatyr.
Tipti, tanymal reseilik shoýmen, akter, telejúrgizýshi Maksim Galkin de ádiletsizdik bolǵanyn ashyq aitty.
