Erteń, 5 maýsymnan 6-syna qaraǵan túni aidyń tutylýy bolady. Tabiǵi qubylysty barsha qazaqstandyqtar kóre alady. Bul týraly Manash Qozybaev atyndaǵy Soltústik Qazaqstan memlekettik ýniversitetiniń professory Andrei Solodovnik aityp berdi, dep habarlaidy Sputnik Qazaqstan.
Aidyń tutylýyn qalai kórý kerek?
"5 maýsym – juma kúni tolǵan ai bolady, odan keiin jartylai kóleńkeli aidyń tutylýy bastalady. Onyń maksimaldy fazasy, iaǵni Aidyń Kún kóleńkesine kirý tereńdigi 0,59 bolady. Negizi, aidyń tutylýyn jii kórýge bolady. Ol kezde aspandaǵy Ai planetamyzdyń dál ortasynda turady", - dedi Solodovnik.
Sondyqtan qiyr soltústikten basqa Eýraziia turǵyndarynyń túgeli derlik osy tabiǵi qubylysty tamashalai alady. Degenmen, aidyń tutylýyn kórý úshin birshama daiyndyq kerek.
Ǵalymnyń aitýynsha, Ai batystan shyǵysqa qarai jyljyp, Jerdiń kúńgirt kóleńkesiniń soltústik jaǵy arqyly ótedi. Jartylai kóleńkeli aidyń tutylýy úsh saǵattan asady.
"Erteńgi tutylý túngi saǵat 23:43-te bastalyp, 03:06-ǵa deiin jalǵasady. Ol kezde 6 maýsym bolady. Al saǵat 1:25-te Ai kúńgirt kóleńkeniń maksimaldy tereńdigine kiredi. Osy tutylýdy kórý úshin jaqsy binokl nemese teleskop kerek. Sebebi Ai kúńgirt kóleńkege kirgende qarańǵylyq túspeidi, aidyń jaryǵy solǵyn tartady", - dep atap kórsetti Solodovnik.
Kelesi tutylýy qashan bolady?
Jalpy, biyl alty tutylý bolady. Eki ret kún tutylsa, ai tórt ret tutylady. Aidyń tutylýy qańtar, maýsym, shilde men qarashaǵa túsip otyr. Al kúnniń tutylýy maýsym men jeltoqsanda bolady. Erteń aidyń tutylýy kórinse, 21 maýsymda kúnniń tutylýyn kórýge bolady.
"Osylaisha, 21 maýsymda úshinshi tutylý bolady. Ol saqina tárizdi. Kún tutylý fazasy Afrika, Saýd Arabiiasy, Pákistan, Úndistannyń soltústigi jáne Qytaidyń ońtústik provintsiialary arqyly ótedi. Tutylýdyń maksimaldy fazasy - 0,994, al saqina tárizdes fazasynyń ýaqyty 38 sekýnd bolady", - deidi Solodovnik.
Ǵalymnyń sózine qaraǵanda, kúnniń tutylýy Eýraziianyń biraz bóliginde, sonyń ishinde Qazaqstanda túske taman kórinedi.
