Ózbekstannyń Ferǵana qalasynda ózderiniń jańa týǵan sábiin satpaq bolǵan erli-zaiypty bes jylǵa bas bostandyǵynan aiyryldy. Tergeý málimetinshe, olar bul qadamǵa qarjylyq qiyndyqtar men jinalǵan nesielerin óteý úshin barǵan, dep habarlaidy ult.kz.
Is materialdaryna sáikes, er adam men áiel 2024 jyly tanysyp, týystarynyń kelisiminsiz dini nekege turǵan. Keiin olardyń bir uly dúniege kelgen. Alaida ýaqyt óte kele otbasynda janjaldar jiilep, qarjylyq qiyndyqtar kúsheigen. Erli-zaiyptylardyń ekeýiniń de qaryzy bolǵandyqtan, olar balany satý týraly sheshim qabyldaǵan.
Sotta áiel bul sheshimge turmystyq qiyndyqtar áser etkenin aitqan. Onyń sózinshe, ákesimen bolǵan janjaldan keiin sábiimen birge úiden ketýge májbúr bolǵan. Osy kezde bir áiel balany basqa otbasyǵa berýdi usynyp, keiin ol úshin aqsha tóleýge daiyn ekenin jetkizgen. Áiel bul usynysty kúieýine aitqanda, bastapqyda ol qarsy bolǵanymen, keiin ekeýi kelisimge kelgen.
Aiyptalýshynyń aitýynsha, olar saýdadan túsetin aqshamen shamamen 6 million sým kólemindegi nesiesin óteýdi josparlaǵan. Sondai-aq kúieýiniń de qaryzdary bolǵan. Qalǵan qarajatqa shetelge baryp jumys istep, baspana salýdy jáne kásibine investitsiia quiýdy kózdegenin aitqan.
Alaida quqyq qorǵaý organdary mámile júzege aspai turyp arnaiy operatsiia júrgizip, erli-zaiyptylardy aqsha alyp jatqan sátte ustady. Olarǵa Ózbekstan Qylmystyq kodeksiniń adam saýdasyna qatysty baby boiynsha aiyp taǵyldy. Sot ekeýin de bes jylǵa bas bostandyǵynan aiyrý týraly úkim shyǵardy.
