QR Memlekettik hatshysy Erlan Qarin Ujymdyq qaýipsizdik týraly shart uiymynyń bitimgerlik kontingentiniń daǵdarys aiaqtalǵannan keiin elderine qaitatynyna senim bildirdi, dep habarlaidy QazAqparat tilshisi.
Bul týraly ol «Habar 24» telearnasyna bergen suhbatynda aitty.
«Qatań, sheshimtal áreketter qabyldaý kerek boldy. Prezident osyndai sheshimder qabyldady da. Ujymdyq qaýipsizdik týraly shart uiymynyń bitimgerlik kontingentin tartý turaqsyzdyq ornatý josparyn buzyp, boldyrmai tastady. Óitkeni bitimgerlik kontingentti shaqyrýdyń arqasynda quqyq qorǵaý organdary men armiianyń kúshterin kontrterroristik operatsiiany júrgizýge shoǵyrlandyrdy.
Biraq osy tóńirektegi saýaldarǵa aldyn ala jaýap bere otyryp, birden atap ótkim keledi. Bul týraly birneshe márte aityldy da. Biraq taǵy bir ret eske salyp, qaitalaý kerek siiaqty. Bitimgerlik kontingent tek strategiialyq nysandardy kúzetý fýnktsiiasyn ǵana oryndaidy», - dedi Memlekettik hatshy.
Sondai-aq, Erlan Qarin eldegi osy bir daǵdarys aiaqtalǵannan keiin syrttan kelgen áskeriler elderine qaitatynyna senim bildirdi.
«Bitimgerlik kontingent eldiń egemendigine nuqsan keltiredi degen áńgimelerdiń bári sóz ǵana. Eger memlekettiń tutastyǵy buzylǵan bolsa, qorǵaityn eshteńemiz de qalmaityn edi. Sondyqtan UQShU-nyń bitimgerlik kontingentin shaqyrý, kerisinshe, memlekettiń tutastyǵyn qorǵaýǵa kómektesti. Prezidenttiń osy sheshimderiniń arqasynda biz elimizdi qorǵap qaldyq dep oilaimyn. Osyny ashyq aitýymyz kerek. Biz tek qana tártipti qalpyna keltirgen joqpyz, memlekettiń tutastyǵyn qorǵap qaldyq. Biz tártipti qalypqa keltirdik degen siiaqty sózderdi aitqanda, elde bolǵan jáne bolyp jatqan ahýaldyń sipatyn tolyq bere almaimyz. Taiaqtyń bir ushynda tek tártipti qalypqa keltirý ǵana emes, memleketti saqtap qalý, qorǵap qalý máselesi turdy. Qańtardyń osynaý dramaǵa toly kúnderinde biz memlekettiligimizdi saqtap qala aldyq», - dedi Erlan Qarin.
