Aqmola oblysy aýdandarynda sý tasqyny saldarynan úsh jolda kólik qatynasy úzildi. Olar: Ereimentaý aýdanynyń Qyzyltý jáne Bestoǵai aýyldary, Atbasar aýdanyndaǵy Esenkeldi aýyly, dep habarlaidy "Ult aqparat" Aqmola oblysy TJD baspasóz qyzmetine silteme jasap.
Vedomstvonyń málimetinshe, sońǵy kúnderi Aqmola oblysynyń barlyq aýdandarynda aýa temperatýrasynyń kóterilýinen qar kúrt eri bastady.
«Qazgidromettiń boljamyna sáikes, sáýir aiynyń ekinshi onkúndiginde aýa temperatýrasy +15-21 gradýsqa deiin kóteriledi dep kútilýde. Bul egistikterdegi qardyń jáne ózenderdegi muzdyń kúrt erýine ákeledi. Aqmola oblysy aýmaǵyndaǵy sý tasqyny burynǵysynsha turaqty shielenis rejiminde ótýde», - dedi vedomstvodan.
Departament basshysy N.Atyǵaevtyń aitýynsha, eń kúrdeli sý tasqyny jaǵdaiy Tselinograd jáne Arshaly aýdandarynda qalyptasqan. Sondyqtan 5-9 sáýir aralyǵynda kúsheitý úshin oblystyń atalǵan aýdandaryna departamentten, sondai-aq, respýblikanyń basqa óńirlerinen, Nur-Sultan qalasynan qosymsha kúshter jiberildi. Departament aldyn ala Atbasar jáne Astrahan aýdandaryna da qosmysha kúshter jibergen bolatyn.
«Tselinograd aýdanynda 7-9 sáýirde temperatýranyń kóterilýi, qardyń erýi jáne erigen qar sýynyń aǵýynyń nátijesinde Qoiandy aýylyndaǵy bes turǵyn úidi sý basyp, 11 adam evakýatsiialandy, onyń beseýi bala. Qazirgi ýaqytta sý basqan turǵyn úiler joq», - dep atap ótti bas aqmolalyq qutqarýshy.
Arshaly aýdanynda sáýirdiń 8-inde respýblikalyq mańyzy bar «Ekaterinbor-Almaty» avtojolynan eki shaqyrym jerdegi (aýdandyq mańyzy bar «Donetskoe aýyly – Anar stantsiiasy» avtomobil jolyna qarai) aýdandyq mańyzy bar jergilikti avtojol ýchaskesinde qarǵyn sý jaiyldy. Anar stantsiiasy men Donetskoe aýylynyń turǵyn úilerin sý basý qaýpi týyndady.
Departament basshysy atap ótkendei, atalǵan aýyldar arqyly ótetin sý ótkizý kanalyn keńeitý boiynsha jumystar júrgizildi. Nátijesinde qaýiptiń aldy alyndy.
Budan bólek, «Esil ózeni – Túrgen aýyly» gidropostynda sý deńgeii qaýipti belgiden 63 sm asyp túsip, sý tasqyny oryn alǵan. Belgi 513 sm, al qaýipti deńgeii 450 sm. Sonymen qatar, barlyq ózender boiynsha gidropostarda sý deńgeiiniń birtindep joǵarylaýy baiqalady.
«Sý tasqyny bastalǵannan beri respýblikalyq, oblystyq jáne jergilikti mańyzy bar avtojol ýchaskelerinde 21 sý tasqyny men bir jol tósemin sý shaiyp ketýi tirkeldi. Eldi mekenderdi sý basý qaýpi joq. Aqmola oblysy aýmaǵyndaǵy sý tasqyny jaǵdaiy jedel shtabtyń, jergilikti atqarýshy organdardyń, azamattyq qorǵaý organdarynyń jáne QR Tótenshe jaǵdailar ministrliginiń táýlik boiy baqylaýynda», - deidi departament basshysy.
