Túrkiia prezidenti Rejep Taiyp Erdoǵan otandastaryn frantsýz taýarlaryn almaýǵa shaqyrdy. Buǵan Frantsiianyń radikal islamǵa qarsy qatań ustanymy sebep boldy. Sońǵy kúnderi osy máselege bailanysty NATO-ǵa múshe eki eldiń arasy ýshyǵyp tur.
Erdoǵan 26 qazanda Frantsiia prezidenti Emmaýel Marondy "psihiatriialyq ekspertizadan" ótýge taǵy da shaqyrdy. Eki kún buryn Túrkiia prezidentiniń osyndai sózi úshin Parij Ankaradaǵy elshisin elge qaitarǵan edi.
"Frantsiiadaǵylar "túrik belgisimen shyqqan taýarlardy almańdar" dedi. Al men óz elimizdegi azamattarǵa ótinish aitamyn. Eshqashan frantsýz belgisi bar taýarlarǵa basymdyq bermeńizder, olardy satyp almańyzdar" dedi Erdoǵan teledidarda sóilegen sózinde.
Frantsiia 17 qazandaǵy Samiýel Pati esimdi muǵalimniń qazasynan qatty eseńgiredi. Sóz bostandyǵy taqyrybyna sabaq ótkende muǵalim Muhammed paiǵambardyń karikatýrasyn kórsetken, sodan kóp uzamai islamist sodyr onyń basyn kesip alǵan.
Alǵash ret Charlie Hebdo satiralyq jýrnalynda jaryq kórgen bul karikatýralar 23 qazanda Frantsiiadaǵy úkimet ǵimarattaryna sáýlemen túsirildi, bul islam áleminiń narazylyǵyn týǵyzdy. "Frantsiia óz karikatýralarynan bas tartpaidy" dedi Makron.
Makron karikatýralardy jaqtap shyqqan soń, musylman jáne arab elderinde frantsýz taýarlaryn almaýǵa úndegender kóbeidi.
Katar men Kýveittiń sýpermarketterinde frantsýz taýarlaryna boikot áli júrip jatyr. Frantsýz taýarlarynan bas tartýǵa shaqyrǵan úndeýler Iordaniiada jáne basqa da elderde kóp aityldy.
Túrkiia statistika qyzmetiniń málimeti boiynsha, Túrkiiaǵa keletin taýar kólemi jóninen Frantsiia 10-oryndy, al túrik taýarlaryn qabyldaý jóninen 7-oryndy alady. Frantsýz kóligi – Túrkiiada eń kóp satylatyn taýardyń biri.
Túrkiia men Frantsiia NATO-nyń músheleri, biraq olar kóp másele boiynsha kelispeidi. Daýly máseleler qatarynda Siriia men Liviia, Jerorta teńiziniń shyǵysyn bólisý jáne Taýly Qarabaq janjaly bar.
