Túrkiia basshysy nátijelerge Minsk kelisimderi negizinde qol jetkizý qajet ekenin atap ótti. Onyń aitýynsha, bar problemalardyń kúrdelenýi, ásirese áskeri qaqtyǵys eshkimge paida ákelmeidi.
"Ankara diplomatiialyq bailanystar men kelissózderdi jalǵastyrýǵa úlken mán berdi jáne shielenisti azaitýǵa, beibitshilikti saqtaýǵa úles qosýǵa daiyn", - dep keltirdi Erdoǵannyń sózin Túrkiia Prezidenti ákimshiliginiń bailanys basqarmasy.
Túrkiia basshysy Ankaranyń NATO aiasynda syndarly kózqarastardy ustanatynyn aityp, dialog pen diplomatiianyń basymdylyǵyn taǵy da atap ótti.
Kongo men Senegalǵa sapary barysynda Erdoǵan Resei men Ýkraina arasyndaǵy kelissózderdiń tezirek qaita bastalýyna úmittenetinin aitty.
"Túrkiia Ýkrainanyń aýmaqtyq tutastyǵyna den qoiady, men ony prezident Vladimir Zelenskiimen telefon arqyly sóilesken kezde de aittym. Biz Minsk kelisimderine qaishy keletin kez kelgen bastamany moiyndamaimyz. Bul rette, jaǵdaidyń odan ári shielenisýine jol bermeý úshin daǵdarysty diplomatiia jáne dialog jolymen sheshý úshin bizge bailanysty barlyq nárseni jasaýǵa daiynbyz", - dedi túrik basshysy.
Erdoǵan sonymen qatar, Pýtinniń KSRO-da respýblikalardy bólý quqyǵyn "baiaý jarylatyn mina" dep ataǵan sózderine pikir bildirdi.
"Munda túrkitildes memleketter týraly aitqan joq dep oilaimyn, biraq olar da bir kezderi Keńes respýblikalarynyń quramyna kirdi. Keńes Odaǵynyń ydyraýy aiasynda 15 memlekettiń táýelsizdik alýy - tarihi jáne quqyqtyq fakt. Resei Keńes memleketi retinde emes, Resei Federatsiiasy retinde ómir súrýdi jalǵastyrdy. Sondyqtan biz bul sózder túrki respýblikalaryna nemese basqa memleketterge qatysty dep oilaǵymyz kelmeidi", - dedi ol.
Erdoǵan túrki memleketteriniń uiymy qandai da bir elge nemese uiymǵa qarsy baǵyttalmaǵanyn atap ótti.
"Pýtin myrza da muny biledi jáne ol bul týraly Ýkrainanyń shyǵysyndaǵy separatistik qurylymdardy taný týraly sóilegen sózinde aitty. Túrkiia bul máselede Qyrym boiynsha ustanymyna berik bolady. Bul týraly Túrkiia biliginiń málimdemesinde naqty aityldy, onda Ýkrainanyń tutastyǵyn saqtaý jáne Reseidiń ustanymy qabyldanbady", - dedi Túrkiia prezidenti.
Sonymen qatar, Erdoǵan Túrkiia Reseimen nemese Ýkrainamen dialogtan bas tartpaitynyn aitty. "Biz osy eldermen bailanystarǵa nuqsan keltirmei, máseleni sheshetin qadamdarǵa kúsh salamyz", - dep túsindirdi el basshysy.
