Túrkiia prezidenti Redjep Taiyp Erdoǵannyń aitýynsha, búginde musylman memleketteri bilim men ǵylymǵa kóp kóńil bólmeidi. Sonyń saldarynan ozyq oily ǵalymdar Batysqa ketip jatyr. Al aqparattyq tehnologiialar salasyndaǵy saýatsyzdyq barsha musylman álemine qaýip tóndirip otyr, dep habarlaidy QazAqparat.
«Kezinde Islam álemi bilim, ǵylym men innovatsiialardyń ortalyǵy boldy. Artynan sonyń barlyǵy ekinshi orynǵa túsip ketti. Sol kezde toqyraý zamany bastaldy. Qazirgi kezde álemdegi musylman halqynyń 55 paiyzy saýatsyz. Ekonomikalyq damý jáne yntymaqtastyq uiymyna múshe memleketterde bilim berý salasyna jalpy ishki ónimniń 5,2 paiyzyn jumsalady. Al musylman elderinde atalǵan kórsetkish 1 paiyzǵa da jetpeidi. Bizdiń mańdai aldy ǵalymdarymyz bolsa, Batysqa ketip, sol jaqta qyzmet etip júr», - dep atap kórsetti Erdoǵan búgin Islam yntymaqtastyǵy uiymnyń ǵylym jáne tehnologiialar jónindegi sammitinde.
Onyń aitýynsha, qazirgi kezde musylman elderi aqparattyq tehnologiialardy shyǵarmaidy. Alaida árbir memleket ulttyq qaýipsizdigine basa nazar aýdarýy qajet.
Astanadaǵy sammitke Ózbekstan, Pákistan, Ázerbaijan, Aýǵanstan, Iran, Túrkiia, Venesýela, Kamor araldary, Mavritaniia, jáne basqa da musylaman memleketteriniń prezidentteri men úkimet basshylary keldi.
Aita keteiik, Islam yntymaqtastyǵy uiymy - 1969 jyly 25 qyrkúiekte musylman memleketteri basshylarynyń Rabatta ótken konferentsiiasynda negizi qalanǵan eń iri jáne yqpaldy úkimettik ári halyqaralyq musylman uiymy. Qazirgi ýaqytta ol jalpy sany shamamen 1,5 milliard adamdy qamtityn 57 eldiń basyn biriktirip otyr.
IYU-nyń negizgi qaǵidattary mynalar: tolyq teńdik; ár halyqtyń óz taǵdyryn ózi sheshý quqyǵyna degen qurmet; ishki isterine aralaspaý; memleketterdiń egemendigin, táýelsizdigin jáne aýmaqtyq tutastyǵyn qurmetteý; IYU-ǵa múshe memleketter arasyndaǵy daýly máselelerdi kelissóz, araaǵaiyndyq nemese arbitraj arqyly beibit jolmen sheshý; uiymǵa múshe memleketter aýmaqtarynyń tutastyǵyna, sonymen birge saiasi táýelsizdigine de qarsy kúsh qoldanbaý nemese qoqan-loqqy kórsetpeý.
Qazaqstan 1995 jyly Islam yntymaqtastyǵy uiymynyń tolyq quqyly múshesine ainaldy.
