Balalar arasynda múgedekter sany artyp barady. Bul týraly QR Eńbek jáne halyqty áleýmettik qorǵaý ministrliginiń keńeitilgen alqa májilisinde Úkimet basshysynyń orynbasary Eraly Toǵjanov aitty, dep habarlaidy "Ult aqparat".
«Birinshiden – áleýmettik az qamtylǵan otbasylardy qoldaý. Bul ataýly áleýmettik kómek qarjylai jáne balalarǵa áleýmettik toptama túrinde beriletindigin jaqsy bilesizder. Bul biylǵy jyldyń úlken jańalyǵy dep aitsam artyq emes. Halyqtyń qabyldaýy da jaqsy. Ár balaǵa berilgen 20 myń teńgelik kómek biyl az qamtylǵan otbasylardaǵy balaǵa ortasha eseppen 26 myń teńgege jeiin jetkizilip otyr. Onyń ishinde birneshe baǵyttar bar ekenin bilesizder. Ataýly áleýmettik kómek, azyq-túlik, jol júrý shyǵyndary, mektepke kerek-jaraqtar, ystyq tamaq bar», - dedi ol.
Onyń aitýynsha, eń mańyzdysy árbir óńir óziniń az qamtylǵan otbasylaryn bilip, olardyń muqtajdyqtan shyǵýyna jaǵdai jasaýy qajet.
«Eńbek ministrligine óńirlermen birlesip, osy baǵyt boiynsha 2 aptalyq merzimde keshendi taldaý jasap, qorytyndy shyǵarýdy usynamyn. Ekinshiden, ana men balany qoldaýǵa bailanysty qarastyrylǵan qarajat kólemi 50 paiyzǵa ósti. Bul da el arasynda jaqsy qabyldanyp jatqan sheshimderdiń biri. Biraq, muny halyq arasynda naqtylap túsindirýge tiispiz. Úshinshiden, múgedektigi bar azamattardy qoldaýǵa bailanysty sońǵy 5 jylda olardyń sany ósýde. Ásirese, balalardyń arasynda ósim 23 paiyz deńgeiinde bolyp tur. Bul rette nege degen suraqtyń turǵany da belgili. Bul saýaldyń naqty jaýaby anyqtalýy tiis. Eńbek ministrligi basqa ministrliktermen, organdarmen birge osy máseleni jan-jaqty qarastyryp, 1 aidyń ishinde naqty usynystar engizýdi tapsyramyn», - dedi Eraly Toǵjanov.
Sonymen qatar ol Eńbek ministrligine «Atameken» UKP-men jáne Kásipodaqtar federatsiiasymen birlesip, 1 aidyń ishinde múgedekterdi jumyspen qamtý boiynsha naqty usynystar engizýdi tapsyrdy.
