Búgin QR Premer-ministriniń orynbasary Eraly Toǵjanov bastaǵan qazaqstandyq delegatsiia jumys saparymen Tashkentke keldi, dep habarlaidy QazAqparat.
Eraly Toǵjanov Ózbekstan Respýblikasy Premer-ministriniń orynbasary Behzod Mýsaevpen Ózbekstan Úkimetiniń ǵimaratynda kelissóz júrgizdi. Kezdesý barysynda koronavirýs infektsiiasy taralýynyń aldyn alý sharalaryn jalǵastyrý jáne epidemiologiialyq jaǵdaidy jaqsartý, sonymen qatar densaýlyq saqtaý, ǵylym jáne bilim salasyndaǵy damýǵa basymdyq bere otyryp, qazaq-ózbek qatynastary damýynyń bolashaqtaǵy máseleleri talqylandy.
«Pandemiia bastalǵan sátten bastap barlyq memleketter jyldam sheshimin tabý kerek problemalyq jaǵdaiǵa tap boldy. Bizdiń elde osy máselelerdi jedel sheshýge baǵyttalǵan Premer-ministrdiń basshylyǵymen arnaiy memlekettik komissiia quryldy. Birinshi kezekte, árine dári-dármekpen qamtamasyz etý turdy. Búgingi kúni biz 900-den astam dári-dármekti elimizde shyǵaramyz. 25 kúnniń ishinde biz Nur-Sultan jáne Almaty qalalarynda eki infektsiialyq aýrýhana turǵyzdyq. Qazir zamanaýi talaptarǵa sai keletin infektsiialyq statsionarlar elimizdiń barlyq óńirinde bar», - dedi E. Toǵjanov.
Ol koronavirýs pandemiiasy meditsinalyq kómek kórsetýdiń sharttary men jalpy densaýlyq saqtaý júiesiniń formatyn ózgertýge májbúr etkenin aitty.
«Densaýlyq saqtaý júiesinde túbegeili ózgerister boldy, keń mobildi jáne qoljetimdilikti eskere otyryp, alǵashqy meditsinalyq kómek kórsetýdiń uiymdastyrý tásilderi qaita qaraldy. Tsifrlandyrý arqyly biznes ortany qalyptastyrý maqsatynda Ashyq jobasy engizilip jatyr. Qaraǵandyda reseilik «Spýtnik V» vaktsinasynyń shyǵarylýy jolǵa qoiyldy, 10 myń doza vaktsina óndirildi», - dedi qazaqstandyq delegatsiianyń basshysy.
Óz kezeginde Ózbekstan Premer-ministriniń orynbasary eldegi epidemiologiialyq ahýal týraly jáne soǵan bailanysty qoldanylyp jatqan sharalar jóninde sóz etti. Sonymen qatar Ózbekstannyń farmatsevtikalyq saladaǵy jetistikterine toqtalyp ótti.
«Epidemiologiialyq jaǵdaidy negizge alyna otyryp, eldegi jedel járdem qyzmeti eki esege artty, barlyǵy 4 myń oryndyq birneshe statsionarlar salyndy. Eń bastysy – barlyq óńirde azamattardy qabyldap, jedel túrde alǵashqy kómek kórsetetin, keiin tiisti emdeý sharalaryn belgileitin úlestirý ortalyqtarynyń qyzmetteri iske qosyldy. Qazirgi kezde Ózbekstannyń farmatsevtikalyq saladaǵy jetistikterin eskere otyryp, Qazaqstannyń osy saladaǵy tájiribesine qyzyǵýshylyq tanytýdamyz», - dedi B. Mýsaev.
Kelissóz barysynda qazaqstandyq delegatsiia quramynda QR Densaýlyq saqtaý ministri Aleksandr Tsoi, Bilim jáne ǵylym vitse-ministri Rústem Biǵary jáne QR Densaýlyq saqtaý ministrligi Sanitarlyq-epidemiologiialyq baqylaý komitetiniń tóraiymy Aijan Esmaǵambetova boldy.
