Qashyqtan oqytý júiesine bailanysty másele de, suraqtar da bar. Bul týraly QR Premer-Ministriniń orynbasary Eraly Toǵjanov aitty, dep habarlaidy "Ult aqparat".
«Epidemiologiialyq jaǵdaidy eskere otyryp, balalardy qashyqtan oqytý qajettiligin taǵy da eskertemiz. Esterińizge sala keteiin, mamyr aiynda karantinnen keiin biraz balabaqshada kezekshi toptaryn ashqanbyz. Artynsha Nur-Sultan qalasynda, Batys Qazaqstan oblysynda, biraz óńirde balalardyń arasynda koronavirýs tirkelgeni belgili. Sondyqtan qaýipsizdik máselesi eshqaida ketken joq. Sonyń bárin eskerip otyrýymyz kerek», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, koronavirýs indetiniń taralý tizbegi bir baladan bastap jalpy qoǵamǵa jetý múmkindigi óte joǵary.
«Ashyǵyn aitqanda bala, synyp, mektep, odan ata-ana, ujym, qoǵam bolyp jalǵasyp kete beredi. Sondyqtan bul baǵytty Memleket basshysy qatań baqylaýǵa alyp otyr. Oqý protsesin jalǵastyrýdyń ár kezeńi jiti qaralyp, monitoring qorytyndylaryn saraptaý arqyly jasalyp otyr. Túsip jatqan árbir suraqqa shuǵyl túrde jaýap ta beriledi. Búgin áli de qashyqtan oqytý júiesine bailanysty másele de, suraqtar da joq emes. Alda atqarylar jumys ta kóp. Turaqty oqý júiesiniń tiimdiligi de, nátijesi men sapasy da artyq ekeni belgili. Degenmen, balalarymyzdy aman saqtap qalý - basty mindetimiz», - dedi Eraly Toǵjanov.
