Sońǵy kezderi bilim berý salasynda er muǵalimderdiń jetispeýshiligi bala tárbiesine keri áser etti degen másele qozǵalyp júr. Sonaý 1990 jyldardyń bas kezindegi oryn alǵan naryqtyq daǵdarys bilim berý ordalaryna úlken soqqy berdi. Mektepterde jas urpaqqa sanaly bilim, sapaly tárbie berýmen ainalysyp júrgen er azamattardyń basym bóligi óndiris oryndaryna bet burdy. Osy kezde bala tárbiesine qatysty jaýapkershiligi zor jumysty moinyna alyp qalǵan jáne búginge deiin talai shákirttiń úlken ómirge aralasýyna úles qosqan áiel muǵalimderdiń eńbegi eren.
Túpqaraǵan aýdanynyń Aqshuqyr aýylyndaǵy maitalman muǵalim, ulaǵatty ustaz Qalamqas Qaliqyzy basqaratyn mektep litseii bilim berý salasynda «Úzdik aýyl mektebi» retinde daralanady. 2014 jyly ashylyp, búginde 1 507 oqýshyǵa bilim berip otyrǵan aýyl mektebinde barlyǵy 123 muǵalim qyzmet etedi.
Sondai-aq bul mektep kadrlyq erekshelikterimen de nazarǵa iligýde. Sapaly kadrlary jaǵynan respýblikalyq mektepterden edáýir aiyrmashylyǵy bar. Óitkeni atalǵan ujymda 30-ǵa jýyq er muǵalim qyzmet etse, olardyń ishinde 2 sheber-pedagog, 3 zertteýshi-pedagog, 5 sarapshy-pedagog, 7 moderator-pedagog qyzmet sapynda. Deni joǵary bilimdi, básekege qabiletti jastardan turatyn ártúrli pánderden sabaq beretin er ustazdary bar bul mektep qai báigede de jeńis tuǵyrynan túspegen.
– Qolynan erekshe is keletin tehnologiia pániniń ustazynan bastap, Bakýde ótken halyqaralyq bairaqty básekede altyn taǵyp, shákirtteri jeńis shyńynan túspeitin dene tárbiesi páni muǵalimi, esepke júirik regat-matematik, úzdik tarihshy ustaz, qazaq tili men ádebieti pánininen sabaq beretin aqyn, akter, júrgizýshi ustazdar, ánshi, jyrshy, shahmatshy, kásipker, BÁD páni ustazdary syndy segiz qyrly bir syrly er ustazdarymyzben maqtanamyz! Olardyń erekshe qarym-qabileti men jigeriniń arqasynda kóptegen baiqaýda báigeni bermeimiz. Bul osy jalyndy jastardyń jańashyldyqqa qumarlyǵynyń, bilimdiliginiń nátijesi, – deidi mektep direktory.
Aqshuqyr mektep-litseii 7 jyldyń ishinde eleýli jetistikterge qol jetkizgen. «Daryn» respýblikalyq ǵylymi-praktikalyq ortalyǵynyń sheshimimen eki dúrkin «Úzdik aýyl mektebi» atalymy, Mańǵystaý oblystyq bilim basqarmasynyń sheshimimen «Úzdik olimpiadalyq mektep», eki ret «Úzdik aýyl mektebi», Mańǵystaý oblysy ákimdiginiń uiǵarymymen «Úzdik mektep-litsei», «Orta bilim beretin úzdik uiym», «Tabiǵatpen úndes mektep», Bilim jáne ǵylym ministrliginiń janynan qurylǵan arnaiy komissiianyń sheshimimen «Úzdik olimpiadalyq aýyl mektebi» atalymymen marapattaldy.
– Joǵary bilimdi mamandar aýdan, oblys deńgeiinde emes, kóbisi respýblikalyq báigelerde at ozdyrǵan júirikter. Er azamattardyń urpaq tárbiesine aralasý úshin mektepke oralýyn qýanyshpen qabyldaimyz, – deidi aýyl mektebiniń kadrlary týraly Túpqaraǵan aýdandyq bilim bóliminiń basshysy Aibarshyn Ýtesbaeva.
Shákirtiniń «aǵai!» degen úninen qýat alyp, táýelsiz eldiń erteńgi tizginustarlaryn baýlyp júrgen er ustazdary kóp mektep – kópke de úlgi.
