Shymkent turǵyny qalanyń jańa halyqaralyq áýejaiynda jolaýshylarǵa namaz oqýǵa arnalǵan arnaiy orynnyń joqtyǵyna shaǵymdandy, dep habarlaidy ult.kz.
Ol áýejaidaǵy jaǵdaidy videoǵa túsirip, áleýmettik jelige jariialaǵan. Turǵynnyń aitýynsha, namaz oqý úshin oǵan reisin kútip otyrǵan jolaýshylar júretin zaldaǵy dálizdi paidalaný usynylǵan.
«Jańa, úlken ári zamanaýi halyqaralyq áýejaida namaz oqityn arnaiy bólmeniń bolmaǵany ókinishti», – dedi ol.
Turǵyn Almaty áýejaiyn mysalǵa keltirdi. Onyń sózinshe, onda erler men áielderge arnalǵan eki namazhana jáne dáret alýǵa qajetti jaǵdai jasalǵan.
Jeli qoldanýshylary da áýejaidaǵy jaǵdaidy talqylap, ózge de máselelerge nazar aýdardy. Keibiri munda ana men balaǵa arnalǵan bólmeniń de joq ekenin aityp, jolaýshylarǵa qolaily jaǵdai jasaý qajet ekenin jazdy.
Áýejai ókilderi ázirge namazhana ashý josparda joq ekenin túsindirdi. Olardyń aitýynsha, terminal jobasy sáýletshiler, tiisti mamandar men sarapshylardyń kelisimimen ázirlengen. Al namazhana salý mindetti talaptar tizimine kirmegen.
Soǵan qaramastan, bul másele investorlarmen talqylanǵan.
«Áýejaida áli ashylmaǵan nysandar kóp. Aldymen ana men balaǵa arnalǵan úsh arnaiy bólme ashýdy josparlap otyrmyz. Keiin jolaýshylardyń demalýyna arnalǵan oryndar iske qosylady. Osy jumystar aiaqtalǵan soń namaz oqityn oryn máselesin de qarastyramyz», – dedi áýejai ókilderi.
