Soltústik Qazaqstan oblysynda bir aptada úsh adam sýǵa ketken, dep habarlaidy "Ult aqparat".
SQO tótenshe jaǵdailar departamenti baspasóz qyzmetiniń málimdeýinshe, Esil aýdanynda jantúrshigerlik oqiǵa bolǵan. Esil ózeniniń jaǵasynda demalyp jatqan otbasynyń 14 jáne 16 jastaǵy eki qyzy 9 jasar týysymen selfi túsirmek bolady. Bir kezde qýatty tolqyn olardy aǵyzyp áketedi. Qyzdardyń 45 jastaǵy ákesi sýǵa kúmp berip, balalaryn qutqarady. Alaida ózi ózenniń adýyndy tolqynynan shyǵa almai, batyp ketken.
Aqqaiyń aýdanynda 69 jastaǵy er adam balyq aýlaimyn dep sýǵa ketken. Araǵa eki kún salyp, Qyzyljar aýdanynda da osyndai oqiǵa qaitalandy. Bul joly 31 jastaǵy er adam qaza tapqan.
Olardyń denelerin qutqarýshylar sýdan shyǵaryp alǵan.
Tótenshe jaǵdailar departamenti turǵyndardan ruqsat etilmegen jerde, mas kúide, arnaýly shomylý quraldarynsyz shomylmaýyn, qaýipsizdik erejelerin saqtaýǵa shaqyrady.
