Qazaqstandaǵy eki munai óńdeý zaýytyna tehnikalyq qyzmet kórsetý men qurylǵylardy jóndeý jobasy engiziledi. Jańa júieniń artyqshylyqtaryn «Ortalyq Aziiadaǵy munai óńdeý men munai himiiasy» atty halyqaralyq konferentsiiada Energetika vitse-ministri Murat Júrebekov atady, dep habarlaidy QazAqparat tilshisi.
«Qazaqstan qazirgi tańda munai óńdeý salasyn damytpasa – bul baǵytta artta qalǵan elge ainalary sózsiz. Minekei, osy sebepti, elimiz kapital tartýda damyǵan elderdiń tájiribesine súienip, jeke zańnamalyq bazasyn damytýdy, investorlarǵa tartymdy usynys jasaýdy kózdeidi. Búkilálemdik Doing Business-2018 bankiniń reitingi boiynsha, Qazaqstan 196 eldiń ishinde 28-shi orynda. Biz aldaǵy ýaqytta da Qazaqstannyń geografiialyq turǵydaǵy artyqshylyǵyn paidalanamyz», - dedi vitse-ministr.
Murat Júrebekovtiń aitýynsha, Qazaqstan óz ishindegi Atyraý, Shymkent pen Pavlodar MÓZ-derin jańǵyrtýdyń arqasynda jergilikti naryqty 100 paiyzǵa janarmaimen qamtyp otyr.
«Tsifrlandyrý aiasynda biz jaqyn arada Atyraý men Shymkent munai óńdeý zaýyttaryna tehnikalyq qyzmet kórsetý men qurylǵylardy jóndeý jobasyn engizýdi josparlap otyrmyz. Bul júie profilaktikalyq tekserister men jóndeý jumystaryn basqaryp, MÓZ-diń úsh jyldyq jóndeýaralyq kezeńine ótýge múmkindik beredi», - dedi ol.
Vitse-ministrdiń aitýyna qaraǵanda, osy júieni engizýdiń arqasynda qurylǵylardyń qyzmet etý qyzmeti 8-10 paiyzǵa artyp, jóndeýge ketetin shyǵyn 10 paiyzǵa azaiady, munai óńdeý kólemi jylyna shamamen 300 myń tonnaǵa artady.
