Bozjyra shatqalynyń aýmaǵyna jáne Batys Qazaqstannyń basqa da tanymal týristik oryndaryna kirý aqyly boldy. Qoryqshylar 291 teńgeden jinaýda, dep habarlaidy Sputnik agenttigi «Aqtaý-Lada» óńirlik basylymyna silteme jasap.
Buǵan deiin bloger Azamat Sársenbaev Bozjyra aýmaǵyna kirý aqyly ekenin jazǵan bolatyn. Ol Bozjyradan 18 shaqyrym jerdegi qoryqshylardyń kishigirim bólmesi "kassa" ekenin aitty.
"ÝAZ Patriot" mingen eki jas jigit Jabaiushqan qoryǵynyń aýmaǵyna kirgen ár kólikten memleket paidasyna 291 teńge tóleýdi talap etedi. Qolma-qol tólem jasai almaisyz, uialy telefon arqyly tóleý múmkin emes. Internet joq. Sońynda úige kelgennen keiin mobildi qosymsha arqyly tóleimin dep kelistik. Qoryqshy da sózime sendi", - deidi Azamat Sársenbaev.
Blogerdiń aqparatyn "Qyzylsai" memlekettik óńirlik tabiǵi parkiniń injeneri Naýryz Ánesov rastady. Oblystyq máslihat qaýlysyna sáikes qoryq aýmaǵyna kirý aqysy 1 naýryzdan beri alynady.
"Tuzbaiyr soryna, Jabaiushqan, Qyzylsai, Tasorpa qoryqtaryna jáne basqa týristik jerlerge kirý úshin ailyq eseptik kórsetkishtiń (AEK) 10%-in - 291 teńge tóleýińiz kerek. Kirý aqysyn kez kelgen bank qosymshasy arqyly tólei alasyz. Qazir kelýshilerdiń basym bóligi bul týraly bile bermeidi, sondyqtan olarǵa eskertý ǵana jasap jatyrmyz", - dep túsindirdi Naýryz Ánesov.
Sondai-aq, ol tabiǵi aimaqtarǵa kirý úshin tólemdi aldyn ala tóleý kerek ekenin eskertti. Týrister tólem jasap bolǵannan keiin, tólemdi dáleldeitin skrinshot nemese túbirtekti arnaiy WhatsApp nómiri arqyly qoryqshylarǵa joldaidy. Qoryq qyzmetkerleri týristik aimaqqa kelgen kezde aqynyń tólengeni týraly túbirtektiń bar-joǵyn da tekserdi.
WhatsApp telefon nómiri: 8 (775) 659-89-59.
Týristik jerlerge kirý aqysy qalai tólenedi (Kaspi.kz qosymshasy negizinde):
1. "Tólemder" bóliminde "Memlekettik qyzmetter, aiyppuldar men salyqtar" bólimin tańdańyz;
2. "Salyqtar" baǵanynda "Jeke tulǵalar úshin salyq" belgileńiz;
3. Óńirler tiziminen Mańǵystaý oblysyn tańdańyz;
4. "Tólem túri" bóliminde KBK 107110 – "JB-ke basqa da salyq túsimderi" belgisin qoiyńyz;
5. "MKB tańdańyz" baǵanynda QR QM MKK Mańǵystaý oblysy boiynsha MKD Qaraqiian aýdany boiynsha MKB" RMM tańdańyz;
6. Tolyq aty-jónińizdi, JSN, tólem maqsaty men somasyn (291 teńge) toltyryńyz.
"Bozjyra" jobasyna qatysty daý
Esterińizge salsaq, qazaqstandyqtar áleýmettik jeli arqyly Bozjyrada qonaq úi salýǵa jappai narazylyq bildirgen bolatyn. Ekologtar men qoǵam belsendileri qarsylyq bildirip, prezident Qasym-Jomart Toqaev ta ún qatty. Ol qoryq aýmaǵyna salynatyn jańa qonaq úidiń qurylysyna qatysty qoǵamnyń teris pikirin eskere otyryp, úkimetke jobany qaita qaraý jóninde tapsyrma berdi. Keiin ekologiia, geologiia jáne tabiǵi resýrstar ministri Maǵzum Myrzaǵaliev qurylys júrgizilmeitinin jariialady.
Buǵan qaramastan, shatqal aýmaǵynda qurylys tehnikasy bolǵany anyqtaldy. Mańǵystaý oblysynyń ákimdigi bul topyraqty zertteýge arnalǵan burǵylaý qondyrǵysy ekenine sendirdi.
6 aqpanda Mańǵystaý oblysynda bolashaq qonaq úi kesheniniń eskizderi usynylǵan jumys jobasy boiynsha qoǵamdyq tyńdaý ótkizildi.
