Jeke jáne zańdy tulǵalarǵa Qazaqstannyń memlekettik týyn turǵyn jáne turǵyn emes ǵimarattarǵa, onyń ishinde balkondarǵa ornalastyrýǵa ruqsat berildi. Bul týraly Úkimettiń jańa qaýlysynda kórsetilgen, dep habarlaidy ult.kz.
Qujatqa sáikes, memlekettik tý ǵimarattarǵa 45 gradýs buryshpen, sondai-aq saltanatty is-sharalar ótetin oryndarda ornalastyrylýy múmkin.
Jeke turǵyn úilerde týdy keminde úsh metr biiktikte ilýge bolady. Mundai jaǵdaida túngi ýaqytta ony jaryqtandyrý mindetti emes. Eger ǵimarattyń sáýlettik nemese tehnikalyq erekshelikteri múmkindik bermese, týdy irgeles aýmaqtaǵy arnaiy tý tuǵyryna ornatýǵa ruqsat etiledi.
Sonymen qatar, memlekettik tý jerge, edenge, sýǵa nemese basqa betterge timeýi tiis. Tý tiginen ilingen jaǵdaida ulttyq oiý-órnek matanyń joǵarǵy bóliginde ornalasýy qajet.
Qaýlyda jeke jáne zańdy tulǵalardyń mádeni, sporttyq, qoǵamdyq jáne ózge de is-sharalarda memlekettik týdy kommertsiialyq maqsatta paidalanýǵa bolmaityny atap kórsetilgen. Sondai-aq tý búlinbegen, taza, myjylmaǵan ári óńi ońbaǵan kúide bolýy tiis.
Budan bólek, memlekettik týdy zań talaptaryn saqtai otyryp, jeke jáne zańdy tulǵalarǵa tiesili kólik salonynda ornalastyrýǵa ruqsat etilgen.
Al memlekettik týdy jarnamalyq maqsatta, sondai-aq kiim, tósek-oryn jabdyqtary, perde, dastarhan, kilemshe jáne basqa da turmystyq buiym retinde paidalanýǵa tyiym salynady.
Qaýlyǵa sáikes, memlekettik rámizderge arnalǵan stendter ornalasatyn oryndar estetikalyq talaptarǵa sai bezendirilip, sharýashylyq bólmelerinen, dálizder men garderobtardan alys jerde ornalasýy qajet.
