© Photo : Press-slýjba akima Aktiýbinskoi oblasti
Qostanai oblysy Áýliekól aýdany máslihatynyń hatshysy Dáýlet Qoishybai órtten zardap shekkenderge gýmanitarlyq kómek jetkilikti kólemde jinalǵanyn málimdedi. Endi baspana salýǵa qurylys materialdary kerek, dep habarlaidy Sputnik Qazaqstan.
Qazirgi kezde gýmanitarlyq júk túsiriletin pýnktte qajetti azyq-túliktiń árbir túri boiynsha 500 tonna taýar jinaldy. Sonyń ishinde un, kúnbaǵys maiy, konserv jáne taǵy basqa ónimder bar. Jeke gigiena zattary men kiim-keshek kóp jinaldy. Jalpy, aýdanǵa 300-den astam kólik kelip, gýmanitarlyq kómek túsirip ketti.
"Búginde barlyq qajetti nárse jetkilikti. Menińshe, zardap shekkenderge tolyǵymen jetedi. Sondyqtan biz azyq-túlik boiynsha gýmanitarlyq kómekti qabyldaýdy toqtatýǵa sheshim qabyldadyq. Barlyq qazaqstandyqqa, kásipkerlerge, metsenattarǵa, qarapaiym halyqqa myń alǵys! Áýliekól aýdany ony eshqashan umytpaidy. Qazir zardap shekkenderge úi salýǵa kiristik. Bizge qurylys materialdary kerek", - deidi Qoishybai.
Onyń aitýynsha, Pavlodar birden eki fýra qurylys materialyn jibergen. Kásipkerler esik, lenoliým jáne taǵy basqa qajetti zattar salyp jiberipti. Al shalǵai jatqandar aqshalai kómek joldap jatyr. Osy oraida máslihat hatshysy qarjylai kómekti biryńǵai esepshotqa jiberýdi surady.
"Bizde biryńǵai esepshot bar. Qazir neshe túrli qor men kómekti uiymdastyryp jatyr. Ózińiz kómektesemin deseńiz, kelip, zardap shekken adamdarǵa qolma-qol berseńiz bolady. Biraq biryńǵai qor men esepshot bar. Sonyń esebinen úi de salynady, kómek te beriledi", - dep atap ótti Qoishybai.
Kómekti turmystyq tehnika jáne jihazben berýge bolady. Sebebi úilerdiń qurylysy aiaqtalǵannan keiin ishin jabdyqtaý qajet.
Aita keteri, Qostanai oblysynda órtten zardap shekkenderge kómek kórsetý boiynsha arnaiy qor ashylǵan bolatyn. Rekvizitteri:
"Qaiyrymdylyq KZ" QQ
BIN 220640046689
IIK KZ82601 A22100 1568 401
Qazaqstan Halyq Banki" AQ BIK HSBKKZKX
Kbe 18.
